Фестивали ҷумҳуриявии «Ҷилваи рангҳо», ки бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон роҳандозӣ шуд, ҷамъбаст гардид. Маросими  ҷамъбасти он дар Муассисаи давлатии фарҳангӣ - фароғатии «Аҳорун» бо намоиши либосҳои миллӣ доир шуд. Дар маросими ҷамъбасти озмун Зафар Гулмаҳмадзода, муовини сардори раёсати рушди иҷтимоии Дастгоҳи иҷроияи Президенти Ҷумҳурии Тоҷикистон, Ҳилолбӣ Қурбонзода, раиси Кумитаи кор бо занон ва оила, Мавсума Муинӣ, муовини раиси шаҳри Душанбе, ширкат ва суханронӣ намуданд.

 

Ҳилолбӣ Қурбонзода дар маросими ифтитоҳ мақсад аз роҳандозии фестивалро гиромидошти арзишҳои миллӣ, рушди ҳунарҳои мардумӣ, тарбияи фарҳанги либоспӯшӣ ва боло бурдани ҳисси зебоипарастӣ арзёбӣ кард. Мавсуф аз ҷумла гуфт: «Либоси миллӣ яке аз рукнҳои ҷудонашавандаи фарҳанги миллат буда, ёдгори нодире аз гузаштагонамон ба шумор меравад. Боиси хушнудист, ки Ҳукумати кишвар ба либоси миллӣ чун унсури муҳими худшиносӣ пайваста таваҷҷуҳи махсус зоҳир менамояд. Натиҷаи ҳамин буд, ки дар замони истиқлолият арзишҳои миллии бонувони мо амиқ омӯхта шуда, ба он навгониҳои зиёде ворид гардиданд, ки ин шавқу завқи мардум, хусусан бонувонро ба либоси миллӣ хеле ва хеле афзуд».

Таъкид шуд, ки фестивал дар 3 давр доир гардид. Даври аввали он дар шаҳраку ҷамоатҳо ва даври дуюм дар сатҳи ноҳия, шаҳру вилоятҳо баргузор шуд. Даври ниҳоии Фестивали ҷумҳуриявии «Ҷилваи рангҳо» дар пойтахти кишвар – шаҳри Душанбе доир гашт. 

Дар он рассомону тарроҳони аз 3 то 40 - сола аз рӯи 6 номинатсия - намоиши либосҳои кӯдакон ва наврасон, барои  қаҳрамонони афсонавӣ ва хоси корвони шодӣ (карнавалӣ), либосҳои рӯзмарраи духтарон, бонувон, ҷавонписарону мардон, либосҳои маросимӣ ва идона, либосҳои расмӣ (протоколӣ) ширкат намуда, ҳунари худро нишон доданд. Иштирокчиёни беҳтарин бо диплом ва сипосномаҳои Кумитаи кор бо занон ва оилаи назди Ҳукумати Ҷумҳурии Тоҷикистон ва туҳфаҳои хотиравӣ қадр  шуданд.

 

Фарзона ФАЙЗАЛӢ, «Ҷумҳурият»