Маркази миллии тестӣ барои онҳое, ки дар даври асосии имтиҳонҳои марказонидаи дохилшавӣ – қисми А (имтиҳон дар заминаи таҳсилоти умумӣ) ё қисми Б (имтиҳон дар заминаи таҳсилоти умумии асосӣ) иштирок карда натавонистанд, мерасонад, ки даври иловагии имтиҳонҳо барои онҳо 12 июли соли равон мегузарад.

Шахсони зерин аз пардохти маблағ барои хизматрасонӣ дар имтиҳонҳо (аз ҷумла, дар даври иловагии он) озоданд: ятимони кулл ва бепарасторони то 21 - сола, маъюбони гурӯҳҳои 1 ва 2, кӯдакони маъюбе, ки падар ё модарашон вафот кардааст ё дар парастории яке аз онҳоянд. Инчунин, шахсони то 21-солае, ки падар ё модарашон вафот кардааст ё дар парастории яке аз онҳоянд, маъюбони гурӯҳҳои 1 ва 2 ва кӯдакони маъюбиятдошта аз пардохти 50 дарсади маблағ барои хизматрасонӣ дар даври иловагии ИМД-2021 озоданд.

Агар шахс ҳам маъюби гурӯҳи 1, 2 ё дар таваллуд маъюбият дошта, ҳам падар ё модараш вафот карда, ё дар парастории яке аз онҳо қарор дошта бошад, аз пардохти маблағ пурра озод аст.

Даври иловагии имтиҳонҳо танҳо дар марказҳои имтиҳонии шаҳри Душанбе баргузор мегардад.

 

 

ДУ ФИЛМИ ТОҶИКӢ ДАР ҚАЗОН

Филми «Насиб» - и коргардони тоҷик Шарофат Арабова дар Кинофестивали байналмилалии Қазон иштирок мекунад. 

Имсол дар ин синамобазм ду филм Тоҷикистонро намояндагӣ мекунад. Дар бахши филмҳои мустанад филми ҳуҷҷатии «Беҳтарин» - и коргардон Муҳсин Раҳимӣ, ки филми муштараки Тоҷикистон ва Кувайт мебошад, қабул гардидааст. 

Филми "Насиб" истеҳсоли Муассисаи давлатии "Тоҷикфилм" буда, соли равон рӯйи кор омад.

 

 

«ФАНДНОМА» ЧОП ШУД

Дар нашриёти «Ирфон» китоби нави адиби тозакор Ҳакималӣ Назиралӣ – «Фанднома» нашр шуд.

Китоб ҳикояҳои ҳаҷвии солҳои охир иншошуда ва танзҳои рамзомези солҳои 80 - уми асри гузаштаи адибро фаро мегирад. Дар оғози маҷмӯа зикр мешавад, ки аксари ҳаҷвияҳои китоб солҳои шӯравӣ дар матбуот рӯи чопро дида, боиси вокунишҳои ҳазорон хонандагон гардиданд.

 

Бузургмеҳри БАҲОДУР, «Ҷумҳурият»