Лента. ру. Ҳаракати иртиҷоии «Толибон» танҳо баъд аз комёб шудан ба созишномаи сиёсӣ ба оташбас розӣ мешаванд. Чунин талаботро намояндаи идораи сиёсии ҳаракати болозикр дар Дубай Суҳайл Шоҳин ба АИР «Новости» баён кард.

Шоҳин тавзеҳ дод, ки музокироти байниафғонӣ дар асоси созишномаи Доҳа баргузор мешавад. Мувофиқи он ҷонибҳо нахуст нақшаи сиёсии банизомдарории муноқишаҳоро баррасӣ намуда, баъдан ба мубоҳиса    ҷиҳати оташбас мепардозанд. «Мо ҳоло ҳам дар раванди музокирот дар бораи нақшаи банизомдарории муноқишаҳо қарор дорем», - зикр кард намояндаи «Толибон».

 

 

Изҳороти СҶТ оид ба вазъи коронавирус дар ҷаҳон 

Известия. «Ҳафтаи гузашта чорумин ҳафтае буд, ки афзуншавии шумораи ҳолати гирифторони COVID-19 дар ҷаҳон ба қайд гирифта шуд. Чунин афзоишро дар шаш минтақаи Созмони ҷаҳонии тандурустӣ ғайр аз як минтақа мушоҳида карданд. Баъд аз 10 ҳафтаи кам гардидани ҳолати марг он низ афзуд», - гуфт раҳбари СҶТ Тедрос Гебрейесус .

Ӯ, инчунин, зикр кард, ки алҳол ҷаҳон вазъияти пуршиддати инфексияи коронавирусро аз сар мегузаронад.

Қаблан корманди калони илмии СҶТ Сумя Сваминатан иттилоъ дод, ки айни замон дар ҷаҳон зиёда аз 100 ваксина бар зидди коронавирус дар ҳоли коркард қарор дорад, ки онҳо метавонанд бар зидди пандемия фоидаовартар бошанд.

 

 

Боздошти гурӯҳҳои террористӣ дар Беларус

Лента. ру. Дар Беларус якчанд гурӯҳи террористиеро, ки аз хориҷи кишвар идора мешуданд, боздошт намуданд. Айни ҳол онҳо ба гуноҳони худ иқрор шудаанд. Дар ин хусус шабакаи телевизионии ОНТ бо истинод ба изҳороти Кумитаи амнияти давлатӣ хабар додааст. 

Тафтишоти фаъолияти гурӯҳҳои террористӣ ҷиҳати содир намудани як чанд ҷиноят, аз ҷумла барои кӯшиши оташ задани таҷҳизоти ҷангал, кандани хати алоқаи Флоти ҳарбӣ – баҳрии Россия дар Вилейки назди Минск ва сӯиқасд ба ҷони журналисти шабакаи телевизиони давлатии Беларус Григорий Азаренко идома дорад.

 

 

Путин аз муносиботи номуътадили солҳои охир бо Украина сухан гуфт

RT. Президенти Россия  Владимир Путин дар мақолааш «Дар бораи таърихи муштараки русҳо ва украинҳо», ки дар сомонаи Кремл интишор гардид, дар бораи зарар дидани Украина аз гусаста шудани иртиботи иқтисодӣ бо Россия сухан гуфт.

«Айни замон Киев дар муносибот бо Россия ақидаҳои сиёсии худро дорад, вале дар солҳои 1991 – 2013 танҳо аз ҳисоби арзиши пасти газ Украина барои буҷети давлатӣ беш аз 82 миллирад доллар сарфа карда буд. Дар ҳолати ҳифзи робитаҳои иқтисодӣ миёни ҳар ду кишвар,  Украина даҳҳо миллиард доллар фоида ба даст меовард», - зикр кард Путин.

Дар мақолаи хеш ӯ муносиботи номуътадили солҳои охирро мусибати ҳар ду кишвар арзёбӣ кардааст.