Дар шаҳри Душанбе маросими ҷоизасупории ғолибони даври ҷумҳуриявии Олимпиадаи фаннии хонандагони муассисаҳои таҳсилоти миёнаи умумии Ҷумҳурии Тоҷикистон (синфҳои 11) баргузор шуд.

Дар он Муҳаммаддовуд Саломиён, муовини якуми вазири маориф ва илм, Мавсума Муинӣ, муовини раиси шаҳри Душанбе ва роҳбарони сохторҳои маорифи шаҳр иштирок намуданд.

Барои шумораи зиёди ҷойҳои ифтихории бадастоварда дар даври ҷумҳуриявии олимпиадаҳои фаннии хонандагон ва ишғоли ҷойи якум байни вилоят ва шаҳру ноҳияҳои кишвар бо Ҷом ва Сипосномаи Вазорати маориф ва илм мақомоти иҷроияи ҳокимияти давлатии шаҳри Душанбе ва ноҳияҳои он қадр гардиданд.

Дастаи олимпии шаҳри Душанбе бо ба даст овардани 663 ҷойи ифтихорӣ (144 ҷойи якум, 230 ҷойи дуюм, 289 ҷойи сеюм) сазовори мақоми аввал шуд. 

 

 

ҶОИЗАИ АББОС АЛИЕВ ТАЪСИС ЁФТ

Нашрияи Вазорати маориф ва илми Ҷумҳурии Тоҷикистон - маҷаллаи «Маърифати омӯзгор» бо мақсади рушди пажӯҳишҳои таълимию методӣ, интишори бештари асарҳои илмиву публитсистӣ ва адабие, ки баҳри баланд бардоштани савияи хештаншиносии насли наврас таъсиргузоранд, ба хотири гиромидошти аввалин нозири маорифи Тоҷикистон ва профессори тоҷик, яке аз таъсисдиҳандагони матбуоти миллӣ Аббос Алиев ба номи ӯ ҷоиза таъсис дод.

Озмун барои дарёфти Ҷоизаи Аббос Алиев дар ду сол як маротиба баргузор гардида, дар он олимон, адибон, рӯзноманигорон, омӯзгорон ва шахсони машғул ба дигар касбу соҳаҳо новобаста ба синну сол, маълумот ва дараҷаи илмӣ иштирок карда метавонанд. 

Ҷоиза дорои шаҳодатнома, нишон ва маблағ (3 ҳазор сомонӣ) буда, дар арафаи Истиқлоли давлатии Ҷумҳурии Тоҷикистон ҷамъбаст мегардад.

 

 

МЕДАЛҲОИ ТИЛЛО ВА НУҚРАИ  ХОНАНДАГОНИ ТОҶИК

Бо сабаби пандемияи коронавирус олимпиадаи JBMO - 2021 (Олимпиадаи математикаи Балкан барои наврасон), ки дар Ҷумҳурии Молдова баргузор гардид, дар шакли онлайн гузашт. Дар олимпиада Азамат Душанов, хонандаи синфи 8-и литсей барои хонандагони болаёқати шаҳри Душанбе дар байни 144 иштирокчӣ аз 24 давлат сазовори ҷои аввал ва медали тилло гардид.

Ҳамчунин, олимпиадаи байналмилалии фанни информатика (IOI) дар давлати Сингапур, ки он ҳам дар шакли онлайн баргузор шуд, аз дастаи мунтахаби кишвари мо хонандаи синфи 11-и литсей барои хонандагони болаёқати шаҳри Душанбе Муҳаммад Ҳокимиён дар байни 351 иштирокчӣ аз 84 давлат медали нуқра ба даст овард.

Бузургмеҳри БАҲОДУР, «Ҷумҳурият»