CentralAsia (CA). Соли 2020 вазъияти гуруснагӣ дар ҷаҳон якбора бад шуд – аз даҳ як ҳиссаи аҳолии замин, наздики 811 миллион нафар  нимгурусна ба сар бурданд. Чунин афзоиши назарраси гуруснагӣ ба пандемияи коронавирус алоқаманд аст, вале ин сабаби ягона намебошад. Дар ин хусус дар ҳисоботи мутахассисони якчанд муассисаҳои СММ гуфта мешавад. 

Норасоии озуқаворӣ дар минтақаҳои гуногуни олам қаблан ҳам мушоҳида мешуд: СММ якчанд маротиба огоҳ намуд, ки одамон гуруснаанд ё ба серӣ намехӯранд ва кӯдакон дар Яман, Судони Ҷанубӣ  ва дигар кишварҳо аз лоғарию бемадорӣ ранҷ мебаранд.  

«Ҳанӯз то пандемияи коронавирус  мо  ҷиҳати ноил шудан ба мақсадҳои дар назди худ гузошта - ҷаҳонро то соли 2030 аз гуруснагӣ ва нимгуруснагӣ раҳо мебахшем, мушкилӣ доштем. Ба мо муноқишаҳо, тағйирёбии иқлим, буҳрони иқтисодӣ халал расонданд, аммо нишондиҳандаҳои имрӯза моро бештар ба таҳлука овардаанд», - мегӯяд иқтисодчии калони ФАО Максимо Тореро. 

 

 

Путин бо Лукашенко вохӯрданд

Лента. ру. Дирӯз вохӯрии Президенти Россия Владимир Путин бо Президенти Беларус Александр Лукашенко баргузор гардид. Мавзӯи асосии вохӯрӣ ҳамкориҳои тиҷоратӣ – иқтисодӣ буд. 

Соли гузашта гардиши мол миёни ҳар ду кишвар бо вуҷуди пандемия то 17 дарсад коҳиш ёфт, ки ин тақрибан 29 миллиард доллари ИМА  мебошад. Аммо соли равон сарфи назар аз пандемияи коронавирус  гардиши мол 37 дарсад афзудааст. Владимир Путин дастовардҳои иқтисодии  Беларусро  қатъи назар аз таъсири омилҳои беруна ва дохилӣ таъкид  намуд.

«Сарфи назар аз коронавирус ва ситезаҷӯиҳои алоқаманд ба таҳримот қарзи хориҷии Минск 2,5 дарсад кам гардид. Беларус шарики устувори Россия ба ҳисоб меравад», - зикр   кард Путин. 

 

 

Истеҳсоли «Спутник V» дар Ҳиндустон

Лента. ру. Истеҳсоли ваксинаи русии зидди коронавирус  «Спутник V» дар калонтарин ширкати истеҳсолкунандаи ваксина дар ҷаҳон Serum Institute of India ба роҳ монда мешавад. Дар ин хусус Фонди  сармоягузориҳои мустақими Россия иттилоъ медиҳад.

Айн замон ширкат ваксинаи англисӣ – шведии AstraZeneca ва ваксинаи ҳиндии Соvovax – ро мебарорад. Интизор меравад, ки корхона ҳамасола зиёда аз 300 миллион воя доруи русиро истеҳсол хоҳад кард. Навбати аввали ваксина моҳи сентябр  омода мешавад. 

Ҳоло ваксинаи «Спутник V» дар 67 кишвари ҷаҳон ба қайд гирифта шудааст.

 

 

Соли равон 1,1 ҳазор муҳоҷир ғарқ шудааст 

Росийская газета. 1146 муҳоҷир ва гурезаҳои кишварҳои гуногуни дунё ҳангоми кӯшиши убури баҳр барои ҳиҷрат ба давлатҳои Аврупо фавтиданд. Чунин маълумотро дар шашмоҳаи соли равон Созмони байналмилалӣ оид ба муҳоҷират интишор намуд.

Зикр мегардад, ки ҳолати  фавт дар ин масирҳо нисбат ба соли гузашта ду баробар афзудааст. 

Созмони мазкур муайян кардааст, ки 896 муҳоҷир ҷиҳати ҳиҷрат ба Аврупо дар баҳри Миёназамин ва 250 нафар барои  ҳиҷрат ба ҷазираҳои Қанар дар уқёнуси Атлантика ғарқ гардидааст.