Бо роҳбарии муовини раиси вилояти Хатлон Фирӯза Шарифӣ ҷаласаи сайёри ситоди вилоятӣ оид ба пешгирӣ аз хуруҷи бемории COVID-19 доир гардид. Дар ҳамоиш, ки дар боғи марказии фароғатӣ - фарҳангии шаҳри Бохтар доир шуд, оид ба аҳамияти пешбурди корҳои безараргардонӣ, тозагии ҷойҳои ҷамъиятӣ, риояи ҳатмии қоидаҳои беҳдоштӣ, фосилаи иҷтимоӣ, истифодаи ниқобҳои тиббӣ ва маҳлули антисептикӣ сухан рафт.

Тавре аз шуъбаи иттилоотию таҳлилии дастгоҳи раиси вилоят хабар доданд, муовини раиси вилоят дастур дод, ки гурӯҳҳои ташвиқотӣ бояд корҳои оммафаҳмониро оид ба қоидаҳои пешгирӣ аз сироятёбӣ ва хуруҷи коронавирус, инчунин, аҳамияти ваксиназанӣ миёни аҳолӣ вусъат бахшанд.

Илова бар ин, дар кӯчаю боғу гулгаштҳо ва дигар ҷойҳои серодам корҳои фаҳмондадиҳӣ гузаронда, ба шаҳрвандон маводи иттилоотӣ ва антисептикиву ниқоб тақсим карданд. Ҳамчунин, бо истифода аз техникаи махсус кӯчаю роҳравҳои маркази маъмурии вилоят безарар гардонда шуданд. 

 

Зокир ҲАСАН,  “Ҷумҳурият”