Вазирони корҳои хориҷии Ҷумҳурии Тоҷикистон ва Ҷумҳурии Исломии Покистон Сироҷиддин Муҳриддин ва Маҳдум Шоҳ Маҳмуд Қурайшӣ дар шаҳри Душанбе мулоқот карданд. Дар рафти вохӯрӣ амалисозии тавофуқоти роҳбарони ду кишвар, вазъи амнияти минтақавӣ, ҳолат ва дурнамои ҳамкории муштарак баррасӣ гардиданд. 

Ҷонибҳо зарурати тавсеаи робитаҳои тиҷоративу иқтисодӣ, сармоягузорӣ ва илмӣ - техникӣ, ҳамкорӣ дар соҳаи саноат ва энергетика, аз ҷумла амалисозии лоиҳаи CASA-1000- ро таъкид карданд. Инчунин, ҳамкории Тоҷикистон ва Покистон дар доираи созмонҳои байналмилалӣ ва минтақавӣ баррасӣ шуд.

 

 

 

Ёрӣ ба зарардидагони  ноҳияҳои Тоҷикободу Рашт

Комиссияи ҳолатҳои фавқулодаи ноҳияи Тоҷикобод ва Ситоди ҷумҳуриявии рафъи оқибатҳои офати табиӣ таҳти роҳбарии раиси Кумитаи ҳолатҳои фавқулода ва мудофиаи гражданӣ Рустам Назарзода аз 123 хонаи сокинони деҳоти Лангари Шоҳи ноҳияи Тоҷикобод, ки бар асари заминларза хисорот диданд, боздид ба амал овард. Дар ин бора маркази матбуоти Кумитаи ҳолатҳои фавқулода ва мудофиаи гражданӣ иттилоъ медиҳад.

Дар пайи заминларзаи рухдода дар деҳаҳои Саричашма ва Бӯстони ин ноҳия 21 хона пурра ва 56 хона қисман хароб гардиданд. Ба зарардидагон ёрии тиббӣ расид, корҳои зиддиуфунӣ роҳандозӣ шуданд, сокинон бо маводи ғизоӣ, ниқоб, маводи зиддиуфунӣ ва обу неруи барқ таъмин гаштанд. 

Ҳамчунин, комиссияи ҳолатҳои фавқулодаи ноҳияи Рашт ва гурӯҳи корӣ аз 146 хонаи зарардида боздид намуданд. Дар ин ноҳия 25 хона пурра ва 25 манзил қисман хароб шудаанд. 

Ба касоне, ки манзили истиқоматиашон пурраву қисман хароб гардидааст, хаймаҳои муваққатӣ барои зист ҷудо ва онҳо бо маводи ғизоӣ таъмин шуданд.