Дар Ҷамоати шаҳраки Навгарзани шаҳри Гулистон чун сухан аз боби ҳунару ҳунармандӣ равад, хурду бузург бо самимият номи Робиямоҳ Мелибоеваро ба забон меоранд. Мавсуф миёни мардуми ҷамоат ва шаҳр бо ҳунари дӯзандагӣ, сӯзанзанию қуроқдӯзӣ, дӯхтани кӯрпачаю либосҳои занона ва бачагона, ҷӯроб ва шарфу алочабофии миллӣ машҳур аст.

 

Зебоиро ҳама дӯст медоранд, вале на ҳар кас зебоӣ офарида метавонад. Робиямоҳ Мелибоева худ дар муҳити зебо - табиати Навгарзан зиста, кӯшиш мекунад, ки ин зебоиро дар офаридаҳояш низ инъикос намояд. Дар ин бора ӯ чунин мегӯяд: “Аз овони наврасиям бо шавқи беандоза ба ҳунари чеварии бибиям таваҷҷуҳ зоҳир мекардам. Мушоҳида мекардам, ки он кас чи ресмон интихоб мекунанду чи рақам ҷомаи мардона ва куртаҳои занонаю ҷиҳози рӯзгор медӯзанд. Ҳарчанд баъди хатми мактаби миёна курсҳои кӯтоҳмуддати ҳамшираи шафқатро хатм карда бошам ҳам, вале ишқи ин ҳунар маро ба худ мекашид. Солиёни дароз чун омӯзгори таълими меҳнат дар муассисаи таҳсилоти миёнаи умумии № 11- и шаҳри Навгарзан фаъолият дошта, духтаронро ҳунари дӯзандагию чеварӣ ёд медодам”. 

- Инак, дар даврони соҳибистиқлолӣ низ баъди бо пешниҳоди Президенти кишвар муҳтарам Эмомалӣ Раҳмон эълон гардидани солҳои 2019 – 2021 ҳамчун Солҳои рушди деҳот, сайёҳӣ ва ҳунарҳои мардумӣ ҳоло хурду калон боз рӯ меоранд ба ҳунари чеварӣ, сӯзанидӯзию қолинбофӣ, ки айни муддаост. Он ҷо, ки ҳунару ҳунармандӣ ривоҷ меёбад, албатта, файзу баракат ҳам зиёд аст,- мегӯяд ин бонуи ҳунарманд.

Робиямоҳ Мелибоева дар доираи вусъати ҳунарҳои халқӣ то имрӯз, аллакай, аз ҳисоби бонувону духтарони хонашин зиёда аз 100 шогирд тайёр кардааст, ки қисман мустақилона ҳунарҳои фаромӯшшудаи ниёгонамонро эҳё карда, ҳамзамон, дар таъмини рӯзгори оила саҳм мегузоранд. Маҳсули дастони ин зани чирадаст дар ҳама чорабиниҳои ноҳиявию вилоятӣ низ ба тамошо гузошта шуда, сазовори баҳои баланд мегардад. 

Рӯзҳои наздик бахшида ба истиқболи Ҷашни 30 - солагии Истиқлолияти давлатӣ дар шаҳри Гулистон намоиши ҳунарҳои халқии ҳунармандон доир мегардад, ки албатта, як гӯшаи онро маҳсули дастони ин бонуи саропо ҳунар оро хоҳанд дод.

 

Ҷовиди АШТӢ, “Ҷумҳурият”