Деҳаи олимпӣ ифтитоҳ ва қабули варзишгарон шурӯъ шуд

То оғози ХХХII Бозиҳои олимпии Токио – 2020 (23 июл – 8 август) беш аз як ҳафтаи дигар боқӣ мондааст. Ба ин муносибат деҳаи олимпӣ расман ифтитоҳ гардида, аввалин варзишгаронро қабул намуд. 

Деҳаи олимпӣ қариб шаш километр дуртар аз варзишгоҳи миллӣ ҷойгир буда, 21 бинои истиқоматӣ (3800 ҳуҷра) дорад. Интизор меравад, ки тақрибан 18000 варзишгар ва шахсони расмии иштирокчии олимпиада дар деҳаи мазкур истиқомат кунанд. Варзишгарон дастур гирифтаанд, ки бояд панҷ рӯз пеш аз оғози бозиҳо ба деҳа ҳозир шуда, на дертар аз ду рӯз пас аз анҷом онро тарк намоянд. 

Маҳдудиятҳо барои ҳифзи саломатии варзишгарон ва коҳиш додани хавфи паҳншавии бемории сироятии COVID-19 пешбинӣ шудаанд. 

Тоҷикистонро дар олимпиада 10 варзишгар – Сомон Маҳмадбеков, Акмал Муродов, Комроншо Устопириён, Темур Раҳимов (дзюдо), Баҳодур Усмонов, Шаббос Нигматуллоев, Сиёвуш Зуҳуров (бокс), Илдар Аҳмадиев (варзиши сабук), Олимҷон Ишанов, Анастасия Тюрина (шиноварӣ) намояндагӣ мекунанд.

Тавре аз Кумитаи миллии олимпӣ хабар доданд, Гулсумбӣ Шарифова (варзиши сабук) бо сабаби лат бардоштани пояш дар Бозиҳои олимпӣ ширкат карда наметавонад.

 

Маҳмуд БАҲРОМ, шореҳи варзиш