Дар робита ба даргузашти Қурбонбӣ Раҳмонова – хоҳари Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз сарварони як қатор давлатҳо ва ҳукуматҳои хориҷӣ номаҳои изҳори тасаллӣ ворид гардиданд.

Президенти Ҷумҳурии Ӯзбекистон Шавкат Мирзиёев дар номаи тасаллии худ гуфтааст:

«Муҳтарам Эмомалӣ Шарифович!

Бародари азиз!

Хабари ҳузнангези марги бармаҳали хоҳари маҳбуби Шумо Қурбонбӣ Раҳмонова моро сахт андуҳгин намуд.

Дар ин рӯзҳои душвор ва ғамангез ба Шумо ва ҳамаи аъзои оилаатон эҳсоси ҳамдардии самимӣ ва тасаллияти амиқ изҳор менамоем.

Аз Аллоҳи бузург хоҳиш дорам, ки рӯҳи рафтагонро баракат диҳад, ба Шумо ва наздиконатон тасаллӣ, ҳамраъйӣ ва сабр фиристад».

 

 

 

 

Нурсултон  Назарбоев,  Президенти  якуми  Ҷумҳурии  Қазоқистон – Елбаси дар номаи тасаллиаш чунин нигоштааст:

«Муҳтарам Эмомалӣ Шарифович!

Хабари даргузашти хоҳари азизатон Қурбонбӣ Раҳмоноваро бо андуҳи амиқ дарёфтам. Даргузашти шахси наздик фоҷиаи ислоҳнопазир аст. Ба Шумо ва пайвандонатон ғамшарикам.

Итминон дорам, ки симои дурахшони марҳум, ки дар Иди муқаддаси Қурбон ба файзи Аллоҳ гузаштааст, дар қалби пайвандон ва дӯстон ҷойгоҳи фаромӯшнашаванда хоҳад гирифт.

Дар ин лаҳзаҳои ҳузнангез, муҳтарам Эмомалӣ Шарифович, ба Шумо, оилаатон ва тамоми мардуми Тоҷикистон изҳори тасаллӣ мекунам».

 

 

 

 

Дар паёми тасаллии Президенти Ҷумҳурии Қазоқистон Қосим-Жомарт Токаев омадааст:

«Муҳтарам Эмомалӣ Шарифович!

Лутфан, таъзияи амиқи маро дар робита ба марги бармаҳали хоҳаратон Қурбонбӣ Раҳмонова қабул фармоед.

Мутаассифона, вируси маккор аз байн бурдани ҷони азизони моро бераҳмона идома медиҳад.

Хотираи неки хоҳари Шумо дар дили тамоми халқи тоҷик ҳамчун як шахси дорои меҳрубонӣ ва хиради фавқулода, ки тамоми ҳаёти худро ба фаъолияти пуршарафи тарбияи насли навраси арзанда бахшидааст, боқӣ хоҳад монд.

Ба талафоти ҷуброннашавандаатон ҳамдард буда, ба Шумо ва наздиконатон дар ин лаҳзаҳои душвор сабру таҳаммул мехоҳам».

 

 

 

 

Дар барқияи тасаллии Президенти Туркманистон Гурбонгулӣ Бердимуҳамедов гуфта мешавад:

«Муҳтарам Эмомалӣ Шарифович!

Лутфан, таъзияи амиқи маро дар робита ба вафоти бармаҳали хоҳаратон Қурбонбӣ Раҳмонова қабул фармоед.

Дар ин лаҳзаи душвор ба ғаму андуҳатон шарик буда, ба Шумо ва ҳамаи аъзои оилаатон сабри ҷамил ва таҳаммул мехоҳам.

Аз Аллоҳи мутаол хоҳиш мекунам, ки марҳумро мағфират кунад ва дар биҳишт ба ӯ осоиштагӣ ато фармояд».