мулоқотҳо
МУЛОҚОТИ ЭМОМАЛӢ РАҲМОН БО ВЭЙ ФЭНХЭ
27 июл дар Қасри миллат Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вазири мудофиаи Ҷумҳурии Мардумии Чин Вэй Фэнхэро, ки бо сафари расмӣ дар Тоҷикистон қарор дорад, ба ҳузур пазируфтанд.
Дар мулоқот ҷонибҳо ҷанбаҳои гуногуни муносибатҳои дӯстӣ ва ҳамкории Тоҷикистону Чинро дар сиғаи шарикии ҳамаҷонибаи стратегӣ баррасӣ карданд. Пешвои миллат муҳтарам Эмомалӣ Раҳмон аз раванди мусбати рушди робитаҳои сиёсӣ, тиҷоратӣ, иқтисодӣ ва фарҳангию гуманитарӣ изҳори қаноатмандӣ карда, ҳамкорӣ дар соҳаи мудофиа ва амниятро самти муҳими муносибатҳои ду кишвари ҳамсоя номиданд.
Таъкид гардид, ки муборизаи муштарак бо терроризм ва экстремизм, ҷудоихоҳӣ, ҷинояткории муташаккили фаромиллӣ, аз ҷумла гардиши ғайриқонунии маводи мухаддир, киберҷиноят ва дигар таҳдидҳо, самти мубрами ҳамкориҳо дар соҳаи амният мебошад.
Дар зимн, ҷонибҳо роҳҳои тақвияти робитаҳоро дар соҳаи амният баррасӣ намуда, ҷиҳати таҳкими минбаъдаи шарикии самарабахши ду кишвар дар ин ҷода дар заминаи дуҷониба ва ҳам дар доираи сохторҳои байналмилалӣ ва минтақавии ҳамкории бисёрҷониба изҳори назар карданд.
Ҳамзамон, ҳангоми вохӯрӣ оид ба масъалаҳои муҳими рӯзномаи байналмилалӣ ва минтақавӣ мубодилаи афкор сурат гирифт. Ба вазъи кунунии низомиву сиёсии Афғонистон ва дурнамои рушди он диққати махсус дода шуд. Зимнан, Сарвари давлат бо изҳори нигаронӣ дар бораи вазъи хатарзои кишвари ҳамсоя, аз ҷумла дар минтақаҳои ҳаммарз бо Тоҷикистон, сухан гуфта, вазири мудофиаи кишвари дӯсти Чинро дар бораи чораҳои аз ҷониби Тоҷикистон дар самти тақвияти ҳифзи сарҳади Тоҷикистону Афғонистон ва, дар маҷмӯъ, иқтидори мудофиавии он андешидашаванда дар ҷараён гузоштанд.
Таъкид рафт, ки якбора бад шудани авзои низомиву сиёсӣ дар минтақаҳои шимолӣ ва шимолу шарқии Афғонистон боиси афзоиши ташаннуҷи вазъ мегардад ва ин ҳолат ба таъмини амнияти минтақа таъсири манфӣ мерасонад. Дар робита ба ин, ҳамкории зичу ҳамгироии хадамоти дахлдор ва сохторҳои махсуси ду кишвар зарур шумурда шуд. Инчунин, аҳамияти мусоидати ҳамаҷониба дар самти пешрафти раванди гуфтушуниди байни афғонон махсусан зикр гардид.
Баёни ақида (0) Санаи нашр: 28.07.2021 №: 149 Мутолиа карданд: 5012