Нахустин даври машварат байни вазоратҳои корҳои хориҷии Ҷумҳурии Тоҷикистон ва Подшоҳии Баҳрайн дар шакли маҷозӣ баргузор шуд. Тарафҳоро муовини якуми вазири корҳои хориҷии Тоҷикистон Хусрав Нозирӣ ва муовини вазири корҳои хориҷии Баҳрайн доктор шайх Абдуллоҳ бин Аҳмад Оли Халифа роҳбарӣ намуданд.

Дар машварат ҳолати кунунӣ ва дурнамои густариши ҳамкории мутақобилан судманд байни Тоҷикистон ва Баҳрайн дар соҳаҳои сиёсӣ, иқтисодӣ, тиҷоратӣ, сармоягузорӣ, сайёҳӣ, кишоварзӣ, алоқаи ҳавоӣ, таҳкими пояи қарордодию ҳуқуқӣ, ҳамкорӣ дар чаҳорчӯби созмонҳои байналмилаливу минтақавӣ ва дигар мавзӯъҳои мавриди эҳтимоми муштарак баррасӣ шуданд.

 

 

 

Боз 2 миллион воя ваксина ворид гардид

Аз Ҷумҳурии Мардумии Чин ба Ҷумҳурии Тоҷикистон 2 миллион воя ваксинаи «CoronaVaс» бар зидди бемории сироятии COVID - 19 ва сӯзандору ҳамчун ёрии башардӯстона ворид гардид.

Дар назар аст, ки ҳафтаи оянда, яъне аввали моҳи август тавассути механизми байналмилалии COVAX ба Тоҷикистон бастаҳои иловагии ваксинаи «AstraZeneca» - и истеҳсоли аврупоӣ ворид шаванд.

То имрӯз ба ҷумҳурӣ беш аз 4 миллион воя ваксина ворид гашт, ки самаранок истифода мешавад. Дар маҷмӯъ, то имрӯз  дар Тоҷикистон зиёда аз 474 ҳазор нафар аҳолӣ ба ваксина фаро гирифта шудаанд.

 

 

 

СҶТ Тоҷикистонро барои мубориза бо тамокукашӣ ситоиш кард

Созмони ҷаҳонии тандурустӣ гузориши махсусро нашр кард, ки дар он, аз ҷумла ба татбиқи чораҳо оид ба маҳдуд кардани паҳншавии сигорҳои электронӣ, инчунин, ҷорӣ намудани тамғаи махсус дар бораи хатари чунин маҳсулот барои саломатӣ даъват намудааст.

Тибқи гузориш, ба кишварҳое, ки дар мубориза бо тамокукашӣ натиҷаҳои беҳтарин ба даст овардаанд, Арманистон, Гурҷистон, Қазоқистон, Молдова, Россия, Украина ва Тоҷикистон дохиланд.

«Мақомоти Тоҷикистон соли 2018 қонуни нави қатъӣ дар бораи назорати истифодаи тамоку қабул кард ва тасмим дорад, ки то соли 2023 ин нишондодро 20 дарсад коҳиш диҳанд. Имрӯзҳо дар Тоҷикистон 26 дарсади мардон ва камтар аз як дарсади занон тамоку мекашанд», - омадааст дар гузориш.

 

 

 

Тоҷикистон дар миқёси ИДМ зинаи баландтаринро касб намуд

Шералӣ Кабир, вазири саноат ва технологияҳои нав, иттилоъ дод, ки тибқи маълумоти оморӣ Ҷумҳурии Тоҷикистон дар миқёси кишварҳои Иттиҳоди Давлатҳои Мустақил дар шаш моҳи соли равон аз лиҳози афзоиши суръати истеҳсоли маҳсулоти саноатӣ, ки 21,5 фоизро ташкил медиҳад, зинаи баландтаринро касб намуд. 

Дар ин раддабандӣ баъд аз Тоҷикистон Беларус ва Молдова бо 11 - фоизӣ ва Ӯзбекистон бо 8,2 фоиз қарор доранд. Инчунин, тибқи  маълумот,  суръати афзоиши  истеҳсоли маҳсулоти саноатӣ дар Чин дар шаш моҳи соли равон 15,9 фоизро ташкил додааст.

 

 

 

COVID - 19. Беш аз 96 дарсад шифо ёфт

Шабонарӯзи охир дар Тоҷикистон 84 ҳолати нави гирифторшавии шаҳрвандон ба бемории коронавируси нави COVID-19 ба қайд гирифта шуд. Ҳамчунин, 68 нафар пас аз муолиҷа солим ба хона баргашт.

Дар маҷмӯъ, аз аввали бақайдгирӣ то 28 июл дар кишвар 14845 нафар  гирифтори  коронавируси  нав сабт шуд, аз ин то санаи зикргардида 14313 нафар (96,4%) шифо ёфт.