Дар толори Муассисаи давлатии «Маркази миллии патенту иттилоот» - и Вазорати рушди иқтисод ва савдо маросими супоридани ҷоизаҳо ба ғолибони Озмуни «Ихтироъкори беҳтарини Тоҷикистон» барои солҳои 2019 - 2020 баргузор гардид.

 

Озмуни мазкур дар асоси дастуру супоришҳои Пешвои миллат муҳтарам Эмомалӣ Раҳмон бо мақсади ҷалби афроди лаёқатманд ба навоварию ихтироъкорӣ, тарғибу ташвиқи соҳа дар байни аҳолӣ, дастгирӣ ва ҳавасманд намудани ихтироъкорону навоварони ҷумҳурӣ,  ҳамчунин, ба муносибати Ҷашни 30 - солагии Истиқлолияти давлатӣ баргузор гардид. Ба озмун 51 нафар бо пешниҳоди 117 ихтироъ барои иштирок дар озмун ҳуҷҷат пешниҳод намуданд.

Тибқи қарори комиссияи озмун устоди Донишгоҳи техникии Тоҷикистон Зумрат Ғайбуллоева ҳамчун ихтироъкори беҳтарини Тоҷикистон дар солҳои 2019 - 2020 сазовори медали тиллои Созмони ҷаҳонии моликияти зеҳнӣ (СҶМЗ) шуд. Номбурда дорандаи 7 нахустпатент, 1 патенти Авруосиёгӣ, 4 аризаи Авруосиёгӣ ба ихтироъ мебошад. Инчунин, Суҳбатҷон Баҳриев бо ҷоизаи олии Ташкилоти патентии Авруосиёгӣ - медали тиллоии ба номи В. И. Блинников сарфароз гардид. Ӯ дорандаи 1 патент, 15 нахустпатент, 2 патенти Авруосиёгӣ, дастурамал барои фермерҳо ва деҳқонҳо мебошад. 

Илова бар ин, се нафар бо ҷоизаи олии Муассисаи давлатии «Маркази миллии патенту иттилоот» - «Нишони фахрии МД ММПИ» ва се  нафар бо ҷоизаи «Нишони Муассисаи давлатии «Маркази миллии патенту иттилоот» ва чор нафар бо дипломҳои дараҷаи аввал, дуюм, сеюм ва олӣ қадр шуд. Ба ихтироъкорони дигар дипломҳои иштирокчии озмун ва туҳфаҳои хотиравӣ тақдим гардид. 

Боймурод Бойзода, сардори раёсати иттилооти илмӣ - техникӣ ва патентии МД "Маркази миллии патенту иттилоот", - изҳор дошт, ки бо истифода аз имкониятҳое, ки Ҳукумати мамлакат фароҳам овардааст, муассисаҳои илмӣ ва истеҳсолӣ, ширкатҳои хусусӣ, олимону ихтироъкорон бояд мунтазам бо роҳи татбиқи натиҷаҳои корҳои илмӣ дар истеҳсолот, кашфиёту ихтирооти нав анҷом дода, усулҳои инноватсионии техника ва технологияи муосирро дар соҳаҳои гуногуни иқтисодиёт ҷорӣ намоянд.

 

Матлубаи АБДУҚАҲҲОР, 

“Ҷумҳурият”