Имрӯзҳо дар  кӯчаю маҳал ва тамоми ташкилоту муассисаҳои Вилояти Мухтори Қӯҳистони Бадахшон чун дигар шаҳру ноҳияҳои ҷумҳурӣ корҳои беҳдоштию тамйизкунӣ ва фаҳмондадиҳӣ хуб ба роҳ монда шуда, ба аҳолӣ ҷиҳати риояи қоидаҳои гигиенаи шахсӣ тавсияҳои махсус дода мешаванд. Инчунин, мақомоти иҷроияи ҳокимияти давлатии вилоят баҳри пешгирии паҳншавии  бемории COVID-19 тамоми тадбирҳоро  меандешад. 

Ҳамарӯза  фаъолони вилоят дар якҷоягӣ бо кормандони соҳаи тиб ҷиҳати пешгирӣ аз паҳншавии бемории сироятии коронавирус бо усули фаҳмондадиҳии  аҳолӣ ба ҳар як деҳаю маҳалла сафар намуда, дар рафти суҳбатҳо хурду бузурги вилоятро  хотиррасон менамоянд, ки барои ҳифзи саломатии худу пайвандон эҳтиёткор бошанд. 

Тавре аз мақомоти иҷроияи ҳокимияти давлатии вилоят хабар доданд, оид ба пешгирии паҳншавии бемории  сироятии коронавирус, муътадил нигоҳ доштани вазъи эпидемологӣ ва ба табобат фаро гирифтани сироятёфтагон тамоми марказҳои саломатии вилоят  дар якҷоягӣ бо Вазорати тандурустӣ ва ҳифзи иҷтимоии аҳолии Ҷумҳурии Тоҷикистон   тадбирҳои заруриро андешида истодаанд. То ин дам 50 ҳазор воя ваксинаи «Модерна» - и  истеҳсоли Иёлоти Муттаҳидаи Амрико  дастраси вилоят гардида, тасмим аст, ки дар навбати аввал  табибону  шахсони калонсол, инчунин, кормандони  соҳаи савдо  ва дигар хизматрасониҳое, ки бештар бо мардум сару кор доранд, бо ин воя таъмин  шаванд. Ҳамчунин, бо супориши раиси вилоят барои ҳифзи саломатии аҳолӣ руйхати сокинони қишри осебпазири вилоят, ки синнашон аз 18 боло аст, тартиб дода шуда, марҳила ба марҳила ваксина гузаронда мешаванд.

Воқеан ҳам, барои мубориза бар зидди коронавирус, қабл аз ҳама,   ҳар шахс бояд бетаваҷҷуҳӣ зоҳир накунад ва аз тавсияҳои духтурон сари вақт ва самаранок истифода барад. Зикр бояд намуд, ки то ин дам ваксинаи “Астрозеника” - и ихтирои Пажӯҳишгоҳи Оксфорди Британияи Кабир ва истеҳсоли  Пажӯҳишгоҳи зардобҳои Ҳиндустон  ҳудуди беш аз 5 ҳазор воя дастраси  сокинони вилоят гардида,  дар марҳилаи аввал ашхоси аз 60 - сола боло ва кормандони соҳаи тиб бо ин  ваксина фаро гирифта шуданд. 

Инчунин, сари вақт таъмин намудани муассисаҳои табобатию профилактикӣ  бо оксиген,  бахусус дар беморхонаҳои маркази вилоят ва ноҳияҳо,  сардорони раёсати тандурстӣ ва Хадамоти Оғохон оид ба тандурустӣ дар вилоят  муваззаф гардиданд, ки ҷиҳати сари вақт таъмин намудани  оксигени табиӣ чораҷӯӣ намоянд. 

Вобаста ба таъмин намудани муассисаҳои тиббӣ  барои табобати беморони  COVID - 19 , 150 кати хоб дар беморхонаи вилоят, 20 кат дар маркази тиббии Оғохони шаҳри Хоруғ, 200 кат дар беморхонаи бемориҳои рӯҳии вилоят, ки дар ноҳияи Роштқалъа ҷойгир аст, омода намуданд.     

Ҳамчунин, пурзӯр намудани корҳои тарғиботиву ташвиқотӣ бо мақсади коҳиш додани  бемории COVID - 19 дар байни аҳолӣ,  риояи қоидаҳои беҳдоштӣ дар бозору хатсайрҳои мусофиркашонӣ, тарабхонаву тӯйхона,  истифодаи ниқобҳои муҳофизатӣ ва риояи фосилаи иҷтимоӣ, кам намудани  теъдоди аҳолӣ дар чорабиниҳои  фарҳангиву оммавӣ аз вазифаҳои муҳими пешгирӣ аз паҳншавии  ин беморӣ ҳисобида  мешавад. Сокинони Вилояти Мухтори Қӯҳистони Бадахшон кӯшиш  менамоянд, ки бо риояи қоидаҳои беҳдоштӣ аз  ин беморӣ ҳарчи зудтар раҳо шаванд.

 

Гулнисои САЪДОНШО, “Ҷумҳурият”