Аз номи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ифтихори Ҷашни 30 - солагии Истиқлолияти давлатӣ туҳфаи гаронарзиш - китоби «Тоҷикон»-и аллома Бобоҷон Ғафуров ба сокинони ноҳияи Деваштич тақдим гардид.

Тавре аз мақомоти иҷроияи ҳокимияти давлатии ноҳия иттилоъ доданд, раиси ноҳия Ашуралӣ Ҷалилзода зимни қабули туҳфаи Пешвои миллат - китоби «Тоҷикон» таъкид намуд, ки он ба ҳар оила расонда мешавад.

Дар асоси супориши Пешвои миллат муҳтарам Эмомалӣ Раҳмон шоҳасари академик Бобоҷон Ғафуров – китоби «Тоҷикон» то Ҷашни 30 - солагии Истиқлолияти давлатӣ ба ҳар оилаи мамлакат тақдим мешавад.

 

 

 

Иштироки Маҳмадтоир Зокирзода дар маросими савгандёдкунии Президенти тозаинтихоби Эрон

Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода  дар маросими савгандёдкунии Президенти тозаинтихоби Ҷумҳурии Исломии Эрон Сайид Иброҳим Раисӣ,  ки дар шаҳри Теҳрон баргузор гардид, дар баробари намояндагони воломақоми  кишварҳои дунё иштирок намуд. Дар ин бора маркази матбуоти Маҷлиси намояндагон хабар дод.

Маросими савгандёдкунии ҳаштумин Президенти Ҷумҳурии Исломии Эрон Сайид Иброҳим Раисӣ дар ҳузури 265 меҳмон аз 115 кишвар баргузор шуд.

Президенти тозаинтихоб савганд хӯрд, ки нигаҳбони Конститутсия ва низоми Ҷумҳурии Исломии Эрон хоҳад буд ва барои ҳалли мушкилоти мардум саъй мекунад.

 

 

 

Баррасии ташаббуси ҷаҳонии Тоҷикистон дар Ню-Йорк

Мулоқоти намояндаи доимии Ҷумҳурии Тоҷикистон дар СММ Ҷонибек Ҳикмат бо намояндаи олии СММ оид ба гурӯҳи кишварҳои кам тараққикарда, кишварҳои тараққикунандаи муҳосирашуда дар хушкӣ ва ҷазиракишварҳои хурди рӯ ба тараққӣ Куртеней Раттрей доир гардид. Дар ин бора Вазорати корҳои хориҷӣ иттилоъ дод.

Зимни вохӯрӣ авлавияти кишвар дар гурӯҳи мамолики тараққикунандаи маҳсур дар хушкӣ, инчунин, масъалаҳои татбиқи Барномаи амали Вена, барқароршавӣ аз ҳамагирии COVID-19, дастрасии баробар ба ваксинаҳо, такмил ва рушди инфрасохтори нақлиётӣ ва энергетикӣ, аз ҷумла сохтмони пули энергетикӣ миёни Осиёи Марказӣ ва Ҷанубӣ (CASA-1000) ва ҳамкориҳо ҷиҳати татбиқи қатъномаи Даҳсолаи байналмилалии “Об барои рушди устувор, 2018-2028” матраҳ шуд.

 

 

Мулоқоти сафири Тоҷикистон бо директори иҷроияи Иттиҳоди соҳибкорони хурду миёнаи Олмон

Сафири Ҷумҳурии Тоҷикистон дар Ҷумҳурии Федеративии Олмон Cоҳибназар Ғайратшо бо директори иҷроияи Иттиҳоди соҳибкорони хурду миёнаи Олмон (Der Mittelstand BVMW) Маркус Йергер мулоқот кард.

Ҷонибҳо дар бораи густариши робитаҳои иқтисодиву тиҷоратии ду кишвар ва ҷалби соҳибкорони хурду миёнаи Олмон ба Тоҷикистон мубодилаи афкор намуданд.

Бо назардошти фазои мусоиди сармоягузорӣ ва ислоҳоти солҳои охири иқтисоди Тоҷикистон, иттиҳоди мазкур ҳавасмандии хешро баҳри вусъати робитаҳои иқтисодиву тиҷоратӣ бо Тоҷикистон иброз намуда, таъйини атташеи тиҷоратии Тоҷикистон дар Олмонро ҳамчун нишонаи таваҷҷуҳи Тоҷикистон дар рушди ҳамкорӣ бо Аврупо арзёбӣ кард.

 

 

COVID-19. 68 ҳолати нави сироят сабт шуд

Шабонарӯзи охир дар ҷумҳурӣ 68 ҳолати нави гирифторшавии шаҳрвандон ба бемории коронавируси нави COVID-19 ба қайд гирифта шуд. Инчунин, 74 нафар аз ин беморӣ табобат ёфт, - хабар медиҳад маркази матбуоти Вазорати тандурустӣ ва ҳифзи иҷтимоии аҳолӣ.

Дар маҷмӯъ, аз аввали бақайдгирӣ то 8 август дар кишвар 15651 нафар гирифтори коронавирус сабт гардида, аз ин шумора то санаи зикргардида 15193 кас (97,1%) шифо ёфт. Ҳамзамон, бар асари бемории мазкур 122 нафар фавтид.