Бонки давлатии амонатгузории Ҷумҳурии Тоҷикистон “Амонатбонк” дар заминаи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ҷиҳати пешниҳод намудани қарзҳои муфид ва дастрас барои аҳолии мамлакат кӯшиш ба харҷ дода, дар ин ҷода, аз соли 2018 дар сохтори раёсати бонк шуъбаи қарзҳои овердрафтӣ ташкил кард, ки фаъолияти он пешниҳод намудани қарзҳои дастрасу муфид ба аҳолии кишвар, махсусан ба кормандони соҳаи иҷтимоӣ мебошад, ки айни ҳол ба зиёда аз панҷ ҳазор муштарӣ хизмат мерасонад, -  иброз дошт Мастура Ёқубова, сардори шуъбаи қарзҳои овердрафтӣ. 

Як нукта боиси зикр аст аст, ки бештари истифодабарандагон кормандони соҳаҳои маориф ва тандурустӣ мебошанд. Бартариятҳои хизматрасонии овердрафтӣ дар он аст, ки муштариёни бонк метавонанд ҳангоми норасоии муваққатии маблағ дар суратҳисоби шахсӣ (яъне корти музди меҳнат ва ё нафақа), аз ҳисоби маблағҳои бонк то 80 фоизи музди меҳнат ва нафақаи моҳона ба муҳлати то 36 моҳ ва бо 22 фоизи солона бе пешниҳоди гарав ва кафил истифода намоянд. Овердрафт қарзи мақсаднок набуда, маблағҳои қарзиро барои мақсадҳои гуногун метавон истифода бурд. Фоизи қарзи овердрафтӣ, танҳо аз рӯи маблағи истифоданамудаи қарз ва барои рӯзҳои истифодашудаи қарз ситонда мешавад. Дар ҳолати тамоман истифода набурдани маблағи қарзи овердрафтӣ фоиз, умуман, ҳисоб карда намешавад. 

Қарзи овердрафтӣ ба шахсони воқеӣ бо шартҳои зерин пешниҳод мегардад:

- муштарӣ бояд дорандаи корти пардохтии БДА Ҷумҳурии Тоҷикистон «Амонатбонк» буда, музди меҳнат ва ё нафақаи худро тавассути бонки мазкур дастрас намояд;

- муштарӣ таърихи хуби қарзӣ дошта бошад ва аз дигар муассисаҳои молиявӣ қарздор набошад ё қобилияти худро барои идора кардани ҳамаи қарзҳои худ исбот карда тавонад.

Аз шахсони воқеӣ барои пайваст намудани хизматрасонии овердрафтӣ ҳуҷҷатҳои зерин талаб карда мешаванд:

- дархост (ариза) барои пайваст намудани хизматрасонӣ;

- шиноснома бо қайди РМА ва розигии корхона, муассиса, ташкилот ва ё мақомоте, ки корманд дар он ҷо фаъолият мекунад (тариқи бастани созишномаи иловагӣ бо бонк), афзалият дорад.

 

Муҳаммадзоиршо ШАРИФЗОДА,

“Ҷумҳурият”