иҷтимоиёт
МУЪМИНОБОД. ҲОЛИ ТАБОҲИ КОРХОНАИ КОММУНАЛӢ
Нарасидани техникаҳо ва набудани шароити хуби корӣ ба фаъолияти мунтазаму босифати корхонаи фаръии манзилию коммуналии ноҳияи Муъминобод монеаи ҷиддӣ эҷод кардааст.
Абдураҳим Шарифов, сармуҳандиси корхона, изҳори нигаронӣ намуда, гуфт, ки дар ихтиёри муассиса ҳафт техникаи корӣ буда, ҳамаи онҳо таъмирталаб ва фарсудаю корношояманд. Аз ин рӯ, масъулон, дар бисёр маврид маҷбур мешаванд, ки ба ҳамаи 35 нуқта партовҳоро бо ароба кашонанд.
- Бинои корхона низ куҳна шуда, таъмирро тақозо дорад. Мутаассифона, то кунун барои навсозии он аз буҷети маҳаллӣ маблағ ҷудо нашудааст. Корхона аз андоз беш аз 540 ҳазор сомонӣ қарздор буда, суратҳисоби он дар раёсати андози вилояти Хатлон муваққатан баста шудааст. Ба суратҳисоби Корхонаи воҳиди давлатии «Хоҷагии манзилию коммуналӣ»-и ҷумҳурӣ дар шаш моҳи соли ҷорӣ 21 ҳазору 500 сомонӣ пардохт намудем. Айни замон бо маблағҳои худӣ фаъолияти корхонаро пеш бурда истодаем. Маблағи ҳаққи хизматрасонии он аз ҳисоби аҳолӣ дар як моҳ наздики ду ҳазор сомониро ташкил медиҳад, ки ҳатто барои хариди сӯзишворӣ намерасад, - гуфт ӯ.
Ба иттилои Тоҷиддин Мирзобаротов, сардори раёсати молияи ноҳия, маоши кормандонаш аз буҷети ноҳия пардохт мешавад. Чунончи номбурда гуфт: «То кунун барои таъмири корхона 150 ҳазор сомонӣ пешбинӣ гардида буд, ки онро пурра пардохтем».
Ҳамзамон, масъулони раёсати молия иттилоъ доданд, ки бо дастури шифоҳии Лутфия Шарифзода, раиси ноҳия, дар корхонаи номбурда санҷиши молиявӣ гузаронда шудааст. Дар рафти санҷиш амалҳои изофанависии масъулони корхона ошкор гардиданд. Аз ҷумла, ҳангоми кашондани партовҳо сарфи сӯзишворӣ дар рӯйхати тақсимот барзиёд дарҷ ёфтааст. Ҳамчунин, хариди молу ашё ва сӯзишворӣ бе бастани шартнома сурат гирифта, талаботи қонун вобаста ба ҳисоботи молиявӣ сарфи назар шудааст.
Яке аз мушкилиҳои дигари соҳа нарасидани қуттиҳои партов дар ноҳия мебошад. Ин ҳолат боиси ифлос гардидани муҳити зист мегардад.
Фирдавс Расулов, сармутахассиси шуъбаи ҳифзи муҳити зисти ноҳия, чунин зикр намуд: «Воқеан, на ҳамаи партовгоҳҳои ноҳия ба талабот ҷавобгӯ мебошанд. Борҳо мушоҳида кардем, ки мағозаю дуконҳои хизматрасонӣ партовҳояшонро ба ҷӯйбор мепартоянд ва бегоҳӣ кормандони корхонаи коммуналӣ онро поккорӣ мекунанд. Дар 5 моҳи соли равон нисбат ба 9 сокини ноҳия санади қонунвайронкунӣ тартиб дода, онҳоро ҷарима бастем».
Тавре аз гуфтаи масъулони корхонаи мазкур ва ҳам бахшҳои молияву ҳифзи муҳити зист бармеояд, шароити номусоиди корӣ боис ба сатҳи пасти хизматрасонии коммуналӣ ва ифлосии маҳалҳо гардидааст. Суоли матраҳ ин аст: "Вазъи номусоид то кай идома мекунад?".
Суннати СОДИҚ, «Ҷумҳурият»
Баёни ақида (0) Санаи нашр: 17.08.2021 №: 163 Мутолиа карданд: 2826