Ҷаҳонро фаро гирифтани бемории сироятии COVID - 19 ба давлатҳои хурду бузург зарари ҷиддӣ овард. Роҳбарияти кишварҳои дунё баҳри нигаҳ доштани ҳифзи саломатии мардуми худ чораҳои гуногун андешид. Аз ҷумла, дар Тоҷикистон низ корҳои безараргардонӣ, таъмини аҳолӣ бо ваксина босуръат ҷараён дорад.

 

Масъулони Ситоди ҷумҳуриявӣ оид ба пурзӯр намудани чораҳои зидди эпидемиявӣ ва пешгирӣ аз интиқолу паҳншавии бемории сироятии COVID-19 тавассути ВАО ва корҳои амалии фаҳмондадиҳӣ дар маҳалҳо ҳамарӯза аҳамияти беҳдоштро талқин мекунанд.

Тибқи маълумоти аз Вазорати тандурустӣ ва ҳифзи иҷтимоии аҳолӣ дастрасшуда, 5945881 нафар бояд ба иммунизатсия фаро гирифта шаванд. Аз ҳамин шумора то 14 августи соли ҷорӣ 1643674 нафар ба вояи якум фаро гирифта шуд, ки аз шумораи умумии аҳолӣ 27,6 дарсадро дар бар мегирад. 

Дар шаҳри Душанбе бояд 745486 нафар ба иммунизатсия фаро гирифта шаванд. Аз ин шумора то чордаҳуми август 451643 нафар ба вояи якум фаро гирифта шуданд, ки 60 дарсадро ташкил медиҳад. Дар як рӯз 62647 нафар бо ваксинаи зиддиковидӣ фаро гирифта мешаванд.

Ёдовар бояд шавем, ки аз ҳашт марти соли равон то 14 август намудҳои “Астро Зенека”, “Ковишилд”, “СиновакКорона Вак”, “Спутник-V”-Гам-КОВИД-Вак”-и ваксина чун ёрдами башардӯстона аз давлатҳои Ҳиндустон, Чин, Шветсия, Озарбойҷон ва Россия ба Тоҷикистон ворид гардида, дар маҷмуъ, 4260740 вояро ташкил медиҳад. Тақсимоти ваксина ба шаҳру ноҳияҳои кишвар тибқи шумораи ба иммунизатсия фаро гирифтани аҳолӣ ба роҳ монда мешавад. Фосила байни вояи якум ва дуюм аз се то чор ва гоҳо 12 ҳафта аст. Ваксинаи “Спутник-V-Гам-КОВИД-Вак”-и Федератсияи Россия, ки чанде пеш ба кишвар ворид шуд, 100 000 вояро ташкил медиҳад ва фосилаи байни вояи якум ва дуюми ваксина 3 ҳафта аст.

Анри Бек, драматург ва мунаққиди фаронсавӣ гуфта буд: “Озодӣ ва саломатӣ ду чизи ба ҳам монанданд. Шумо онҳоро вақте қадр мекунед, ки аз даст медиҳед!».

 

Шаҳзода АШУРАЛИЕВА, донишҷӯ