Вазири корҳои хориҷии Ҷумҳурии Тоҷикистон Сироҷиддин Муҳриддин сафири фавқулода ва мухтори Ҷумҳурии Мардумии Чин дар Тоҷикистон Лю Бинро ба ҳузур пазируфт. Дар ин бора Вазорати корҳои хориҷӣ хабар дод.

Ҷонибҳо оид ба масъалаҳои муҳими ҳамкорӣ ва баргузории чорабиниҳо дар чорчӯбаи Созмони ҳамкории Шанхай дар Душанбе мубодилаи афкор намуданд.

 

 

 

Мулоқоти вазирони корҳои хориҷии Тоҷикистон ва Олмон

Сироҷиддин Муҳриддин, вазири корҳои хориҷӣ, бо вазири федеролии корҳои хориҷии Ҷумҳурии Федеративии Олмон Ҳайко Маас гуфтугӯйи телефонӣ анҷом дод. Ҷонибҳо масъалаҳои ҳамкории дуҷониба дар соҳаҳои сиёсӣ, амниятӣ, гуманитарӣ, ширкат дар чорчӯбаи созмонҳои байналмилалӣ ва минтақавиро баррасӣ карданд. 

Ҳамчунин, оид ба вазъ дар Афғонистон ва таъмини амнияти минтақавӣ мубодилаи афкор намуданд. Бо назардошти авзои ноором ва мураккаби ҳарбию сиёсӣ дар кишвари ҳамсоя ва марзи муштараки кишварҳои Осиёи Марказӣ бо Афғонистон ҷонибҳо аҳамияти таҳкими ҳамкориро барои андешидани тадбирҳои муассир алайҳи хатарҳои амниятӣ, аз ҷумла терроризм, ифротгароӣ ва қочоқи маводи мухаддир, зикр намуданд.

 

 

 

Баррасии як лоиҳа дар мулоқоти Баҳодур Шерализода бо сафири Туркия

Баҳодур Шерализода, раиси Кумитаи ҳифзи муҳити зист, бо сафири Туркия дар Тоҷикистон Эмре Зеки Карагол мулоқот кард. Дар вохӯрӣ оид ба Лоиҳаи партовҳои сифрии Туркия, ки таҳти сарпарастии хонум Эмине Эрдуғон, ҳамсари Президенти Туркия, ба амал бароварда шудааст, мубодилаи афкор сурат гирифт.

Сафири Туркия оид ба ҷараёни иҷрои лоиҳаи «Zero Waste» (партовҳои сифр), ки дар Туркия татбиқ мешавад, иттилоъ дода, зикр намуд, ки Туркия кишварҳои дигарро ба ин лоиҳа даъват мекунад. Ҳамчунин, таъкид кард, ки Туркия дар якҷоягӣ бо шарикони байналмилалӣ омода аст ба татбиқи лоиҳаи мавриди назар дар Тоҷикистон мусоидат намояд.

Ҷонибҳо оид ба масъалаҳои баррасишуда ба мувофиқа расиданд.

 

 

 

“Рушди ҳуқуқи инсон дар 30 соли Истиқлолияти давлатӣ”

Зери ҳамин унвон бо ташаббуси Ваколатдор оид ба ҳуқуқи инсон дар Ҷумҳурии Тоҷикистон дар Китобхонаи миллӣ ба муносибати 30 - солагии Истиқлолияти давлатӣ конфронси ҷумҳуриявӣ баргузор шуд. Дар ин бора аз дафтари Ваколатдор оид ба ҳуқуқи инсон хабар доданд.

Дар конфронс Ваколатдор оид ба ҳуқуқи инсон Умед Бобозода аз паҳлуҳои таърихӣ, сиёсӣ ва ҳуқуқии Истиқлолияти давлатӣ, дастовардҳои Тоҷикистон дар самти ҳуқуқу озодиҳои инсон ва тақвияти сулҳу суботи ҷомеа ёдовар шуда, афзуд, ки Истиқлолияти давлатӣ ба Тоҷикистон имкон дод, то дар арсаи байналмилалӣ эътироф гардад ва ташаббусҳои Роҳбари давлат дар сатҳи миллӣ, минтақавӣ ва байналмилалӣ мавриди таваҷҷуҳ қарор гирифта, ҳамовозию дастгирӣ ёбанд.

 

 

 

Боз 8 оилаи зарардида аз сел дар ноҳияи Вахш соҳиби хона шуд

Раёсати Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар вилояти Хатлон хабар дод, ки муовини раиси вилоят Акрам Сулаймонзода ба 8 оилаи зарардида аз сели 11 май дар деҳаи Иттифоқи Ҷамоати деҳоти 20-солагии Истиқлолияти Тоҷикистони ноҳияи Вахш калиди хонаҳои навро тақдим намуд.

Акрам Сулаймонзода, ҳамчунин, дастур дод, ки то Ҷашни 30 - солагии Истиқлолияти давлатӣ бунёди хонаҳои дигар низ ба анҷом расонда шавад.