Хабарҳо
Тақрибан 10 миллион кӯдаки афғон ба ёриҳои башардӯстона ниёз дорад
ТАСС. Директори иҷроияи Бунёди кӯдакони Созмони Милали Муттаҳид (ЮНИСЕФ) Ҳенриетта Фор хабар дод, ки созмон расондани ёрии башардӯстонаро ба Афғонистон, ки тақрибан 10 миллион кӯдак ба он ниёз дорад, идома медиҳад.
“Уҳдадории мо ба кӯдакони Афғонистон бетағйир аст ва ҳадафи мо он аст, ки ҳуқуқи ҳар яки онҳо ҳифз карда шавад”, - гуфт ӯ ва таъкид намуд, ки ЮНИСЕФ “ҳоло ва дар вақтҳои наздик дар ҷойи худ боқӣ хоҳад монд”. “Имрӯз, тақрибан 10 миллион кӯдак дар Афғонистон барои зинда мондан ба кумаки башардӯстона ниёз дорад. Тахминан 1 миллион кӯдак давоми ин сол бо норасоии шадиди ғизо дучор мешавад ва метавонад бидуни табобат бимирад”, - гуфт Фор. Аз рӯйи ҳисобҳо, тахминан 4,2 миллион ҷавони афғон ба мактаб намеравад, ки беш аз 2,2 миллиони онҳо духтаронанд. Аз моҳи январ намояндагони СММ беш аз 2000 ҳолати вайрон намудани ҳуқуқи кӯдаконро дар ин кишвар ҳуҷҷатгузорӣ кардаанд.
СААД аз эҳтимоли ҷанги шаҳрвандӣ дар Афғонистон нигаронӣ кард
Лента.ру. Муқовимати «Толибон» (мамнуъ дар Россия), ки дар Афғонистон ба вуҷуд омадааст, метавонад боиси ҷанги шаҳрвандии дарозмуддат гардад. Ин нигарониро ба АИР «Новости» Дабири кулли Созмони Аҳдномаи амнияти дастҷамъӣ (СААД) Станислав Зас изҳор кардааст.
Дабири кулл таъкид намуд, ки ҷанги эҳтимолии шаҳрвандӣ барои амнияти на танҳо Афғонистон, балки тамоми минтақаи Осиёи Марказӣ пайомадҳои пешгӯйинашаванда дорад. Вай, ҳамчунин, ИМА ва НАТО -ро дар он айбдор кард, ки хуруҷи “омода набуда” - и онҳо аз хоки Афғонистон муддати дароз таҳдид ба “сулҳ ва суботи байналмилалӣ” -ро меафзояд.
Reuters: «Байден дар 24 соат тасмим хоҳад гирифт»
ТАСС. Интизор меравад, ки Президенти Амрико Ҷо Байден дар давоми 24 соати оянда тасмим гирад, ки оё пас аз 31 август муҳлати амалиёти низомии эвакуатсияи амрикоиҳо аз Афғонистон тамдид карда шавад ё на.
Тибқи маълумот, баъзе мушовирони Президенти Амрико бо далелҳои амниятӣ ба тамдиди амалиёт мухолифанд. Як намояндаи маъмурият гуфт, ки Байден метавонад ниятҳои худро дар ин бора дар нишасти таъҷилии G-7 оид ба вазъи Афғонистон, ки рӯзи сешанбе тариқи маҷозӣ баргузор мешавад, изҳор намояд.
Мавқеи якҷояи СААД оид ба вазъи Афғонистон таҳия мешавад!?
Мир 24. Рӯзи душанбе нишасти ғайринавбатии СААД тавассути видеоконфронс баргузор шуд. Александр Лукашенко тақвияти минбаъдаи марзҳои созмон, аз ҷумла марзи Тоҷикистону Афғонистонро зарур медонад.
Бинобар вазъи душвори Афғонистон дар минтақаи нуфузи СААД, хатари терроризм, ҷиноятҳои фаромарзӣ, қочоқи маводи мухаддир ва аслиҳа меафзояд. Александр Лукашенко пешниҳод намуд, ки дар саммити ду созмон, яъне СААД ва СҲШ дар Душанбе як мавқеи муштарак таҳия ва баррасӣ шавад.
Баёни ақида (0) Санаи нашр: №: Мутолиа карданд: 1168