Аз ҷониби муовини якуми Роҳбари Дастгоҳи иҷроияи Президенти Ҷумҳурии Тоҷикистон Фирдавс Ҳаётзода ба кормандони Дастгоҳи иҷроияи Президенти Ҷумҳурии Тоҷикистон ва корхонаву муассисаҳои тобеи он мукофотҳои давлатӣ, ки бо Фармони Президенти Ҷумҳурии Тоҷикистон муҳтарам Эмомалӣ Раҳмон сарфароз гардонда шуданд, тақдим гардид.

Дар маҷмуъ, ба 4 нафар медали Хизмати шоиста, ба 2 нафар медали Шафқат, ба 5 нафар медали ҷашнии «30-солагии Истиқлолияти давлатии Ҷумҳурии Тоҷикистон», ба 3 нафар Ифтихорномаи Ҷумҳурии Тоҷикистон, ба 4 нафар Ифтихорнома ва ба 35 нафар Раҳматномаи Дастгоҳи иҷроияи Президенти Ҷумҳурии Тоҷикистон супурда шуданд.

 

 

 

«Беҳтарин лоиҳаҳои соҳибкории ҷавонон»

Таҳти ин унвон 27 август дар шаҳри Душанбе бо ҷалби соҳибкорони ҷавони давлатҳои аъзои СҲШ ва ИДМ Форуми байналмилалии ҷавонон баргузор мегардад, - хабар медиҳад Кумитаи кор бо ҷавонон ва варзиш.

Дар назар аст, ки дар форум роҳбарияти вазорату идораҳои дахлдор, намояндагони сафоратхонаҳои муқими шаҳри Душанбе ва ҷавонони фаъол иштирок менамоянд.

Ҳадаф аз баргузории форум имкони татбиқи ҳамгироии иқтисодии ҷавонон, мустаҳкам намудани риштаҳои дӯстӣ байни соҳибкорони ҷавони тоҷик бо дигар мардуми олам ва рушду тавсеаи имконияти сайёҳии Тоҷикистон мебошад.

 

 

 

Китобҳои нодири дастнавис ва  чопи сангӣ намоиш дода мешаванд

Дар Осорхонаи миллии Тоҷикистон бахшида ба Ҷашни 30-солагии Истиқлолияти давлатӣ ва бо мақсади муаррифию арҷгузорӣ ба мероси хаттии тоҷикон таҳти унвони «Мероси хаттӣ – бозгӯйи осори ниёгон» намоиш ифтитоҳ гардид, ки то 20 сентябр идома меёбад.

Дар намоиш аз фонди Осорхонаи миллӣ зиёда аз 120 намунаи гуногуни китобҳои нодири дастнавис ва чопи сангӣ, ки фарогири мавзуъҳои таърих, ирфон, ахлоқ, забону адабиёт, сарфу наҳви арабӣ ва фиқҳи ҳанафӣ мебошанд, ба маъраз гузошта шудаанд.

Ҳамчунин, 20 сиккаи таърихӣ (санадҳо оид ба харидуфурӯши замин), 11 лавҳаи ҳунари хушнависӣ, 4 сӯзании катибадор ва дигар мероси таърихию фарҳангӣ, ки инъикосгари таъриху фарҳанг, китобдориву китобсозӣ ва ҳунарҳои хаттотӣ, хушнависӣ ва саҳифабандиву муқовасозии ниёгони мо мебошанд, пешниҳод гардидаанд.

 

 

 

КОРОНАВИРУС. Дар Тоҷикистон 98,6 дарсади беморон шифо ёфтанд

Давоми шабонарӯзи охир дар Тоҷикистон 46 ҳолати нави гирифторшавии шаҳрвандон ба бемории коронавируси COVID-19 ба қайд гирифта шуд. Ҳамчунин, 58 нафар аз ин маризӣ табобат ёфт, - хабар медиҳад Вазорати тандурустӣ ва ҳифзи иҷтимоии аҳолии Ҷумҳурии Тоҷикистон.

Дар маҷмуъ, аз аввали бақайдгирӣ то 23 август дар кишвар 16514 нафар гирифтори COVID-19 сабт гардида, аз ин шумора то санаи зикргардида 16297 кас (98,6%) шифо ёфт. Ҳамзамон, бар асари бемории мазкур 124 нафар фавтид.

Вазорати тандурустӣ ва ҳифзи иҷтимоии аҳолӣ аз сокинони кишвар даъват ба амал меорад, ки дар ҷойҳои ҷамъиятӣ қоидаҳои пешгирикунандаи бемории коронавирусро қатъиян риоя намоянд.