Хабарҳо
Навидҳои фарҳанг
ШИРИНБЕК - ҒОЛИБИ ОЗМУНИ БАЙНАЛМИЛАЛИИ “JEONJU-2021”
Чанде пеш дар шаҳри Чонҷуи Ҷумҳурии Корея ғолибони Озмуни байналмилалии “Чонҷу - 2021” (“Jeonju International Awards for Promoting Intangible Cultural Heritage, 2021”) дар самти ҳифзи мероси фарҳангии ғайримоддӣ эълон гардиданд. Яке аз ғолибони озмун зодаи Тоҷикистон Ширинбек Давлатмамадов мебошад.
Аз байни 44 довталаб, ки 29 кишварро намояндагӣ мекарданд, пирӯз шудани ҳамдиёри мо боиси ифтихор аст.
Ширинбек Давлатмамадов ҷарроҳ, табиби мардумӣ, роҳбари созмони "Гулу гиёҳ" буда, давоми 50 соли фаъолияти хеш ҳазорон маризро шифо бахшида, дар бораи гиёҳҳо ва чашмаҳои шифобахши Бадахшон китобҳои арзишмандеро таълиф намудааст.
ЗАНОН ВА ИСТИҚЛОЛ. ЯК ҲАМОИШИ МУҲИМ
Дар Китобхонаи миллии Тоҷикистон бо ташаббуси Кумитаи кор бо занон ва оилаи назди Ҳукумати Ҷумҳурии Тоҷикистон конференсияи ҷумҳуриявӣ дар мавзуи "Занон ва истиқлол" баргузор гардид.
Дар кори он занони фаъоли ҷумҳурӣ, инчунин, қишри муҳими роҳбарикунандаи мамлакат раиси Кумитаи кор бо занон ва оила Ҳилолбӣ Қурбонзода, вазири фарҳанг Зулфия Давлатзода иштирок ва суханронӣ карданд.
Сухангӯён таъкид карданд, ки Истиқлоли давлатӣ ба занон ҳуқуқу озодӣ ва имкониятҳои васеи фаъолият фароҳам овард. Бонувони сарфарози тоҷик дар замони соҳибистиқлолӣ дар ҳама соҳаҳо фаъол гардида, дар муаррифии кишварамон саҳми шоиста гирифтанд.
МУҶАССАМАИ МУБОРАКШО ДАР РӮШОН
19 августи соли ҷорӣ ба ифтихори шастумин солгарди овозхони тоҷик Муборакшо Мирзошоев дар боғи марказии шаҳраки Вамари ноҳияи Рӯшон пайкараи ӯ қомат афрохт.
Дар ифтитоҳи муҷассама устодону дӯстон, мухлисон ва пайвандони Муборакшо ширкат варзиданд. Сарояндаҳои шинохтаи тоҷик Далер Назаров, Нобовар Чаноров ва Далер Султонов аз вижагиҳои ҳунари мавсуф сухан гуфта, таъкид карданд, ки сурудҳои таъсирбахшу садои форами Муборакшо фаромӯш намешавад.
Бузургмеҳри БАҲОДУР,
«Ҷумҳурият»
Баёни ақида (0) Санаи нашр: №: Мутолиа карданд: 1026