Кумитаи рушди сайёҳии назди Ҳукумати Ҷумҳурии Тоҷикистон аз ворид гардидани боз як ширкат ба бозори сайёҳии мамлакат хабар дод. Раиси кумита Тоҷиддин Ҷӯразода зимни як ҷаласа ба роҳбари ширкати навтаъсиси «Шумон»  Бахтовар Аминзода  иҷозатномаи фаъолиятро супурд, - иттилоъ доданд аз кумита.

Ширкати “Шумон” дар шаҳри Ҳисор таъсис ёфта, ҳадафи он рушди сайёҳии дохилӣ бо фарогирии сайёҳии табобатӣ, фарҳангӣ, аграрӣ ва экологӣ мебошад. 

Тавре роҳбари ширкати сайёҳии “Шумон” Бахтовар Аминзода иброз доштааст: “Дар оянда ният дорем ҳамкориро бо ширкатҳои сайёҳии ҷумҳурӣ ва кишварҳои хориҷӣ, хусусан давлатҳои Осиёи Марказӣ, тавсеа бахшем. Алҳол бо яке аз ширкатҳои сайёҳии Ӯзбекистон - «Самарқанд тревел» вориди  гуфтушунид шудаем”.

Кумитаи рушди сайёҳӣ, инчунин, муҳлати  фаъолияти ширкати “Вояж тур” - ро низ тамдид намуд. Роҳбарони ширкатҳои сайёҳии навтаъсис аз дастгириҳои пайвастаи Ҳукумати ҷумҳурӣ арзи сипос намуда, омодагии худро барои ташкили барномаҳои ҷолиб ва хатсайрҳои нав ҷиҳати ҷалби бештари сайёҳон изҳор доштанд.

Дар заминаи имтиёзҳои дар соҳаи сайёҳӣ пешниҳоднамудаи Ҳукумати Ҷумҳурии Тоҷикистон фаъолияти бахши хусусӣ густариш ёфта, шумораи ширкатҳои сайёҳӣ, меҳмонхонаҳо ва дигар инфрасохтори хизматрасонии бахши сайёҳӣ дар ҷумҳурӣ зиёд  гардид. Ин тадбирҳо ба рушди деҳот, хусусан устувор гаштани соҳаи сайёҳӣ дар мамлакат таъсири мусбат мерасонанд. Ҳоло  дар бозори сайёҳии Тоҷикистон беш аз 230 ширкати сайёҳӣ фаъолият дорад.

 

Нигина РАҲМОН, «Ҷумҳурият»