Хабарҳо
ЛИГАИ ОЛӢ
Пирӯзии "Истиқлол" ва "Хуҷанд" дар даври 17-ум
24 – 25 август бозиҳои даври 17-уми Чемпионати Тоҷикистон оид ба футбол миёни дастаҳои Лигаи олӣ баргузор гардид. Садрнишини ҷадвали чемпионат – «Истиқлол» бо натиҷаи калони 5:0 бар дастаи «Душанбе» ғолиб омад, - хабар доданд аз ЛФТ.
Дар бозии дигар тими «Хуҷанд» дар майдонаш ба дарвозаи дастаи «Хатлон» ду голи беҷавоб зад.
Вохӯрӣ миёни «Файзканд» ва «Равшан» мусовӣ (0:0) ба анҷом расид.
Натиҷаи ду рақобати дигар: «Истаравшан» – «Кӯктош» – 2:2 ва «Эсхата» – КМВА – 1:2.
БАДМИНТОН
Варзишгарони Хатлон мақоми аввалро гирифтанд
Бахшида ба 30 - солагии Истиқлолияти давлатии Ҷумҳурии Тоҷикистон дар Маҷмааи варзишии шаҳри Хоруғ байни наврасон мусобиқаи ҷумҳуриявӣ оид ба бадминтон доир шуд.
Тибқи иттилои масъулони мусобиқа, бадминтонбозони вилояти Хатлон маҳорати баланд нишон дода, мақоми аввалро касб карданд.
Варзишгарони ВМКБ ва вилояти Суғд мутаносибан зинаҳои дуюму сеюмро гирифтанд.
БОЗИҲОИ ПАРАЛИМПИИ ТОКИО – 2020
Кӣ нахустин медалро ба даст овард?
XVI Бозиҳои паралимпӣ 24 август расман дар Токио (Ҷопон) ифтитоҳ гардид. Аввалин медали тиллои ин мусобиқоти бонуфузро Пейҷ Греко (Австралия) дар риштаи велосипедронӣ ба масофаи 3000 метр соҳиб шуд. Мақомҳои дуюму сеюмро Ванг Сяомэй (Чин) ва Дениз Шиндлер (Олмон) ба даст оварданд.
Бояд гуфт, ки Паралимпиада то 5 сентябр идома ёфта, беш аз чор ҳазор варзишгар барои 539 маҷмуи медалҳо дар 22 намуди варзиш рақобат хоҳад кард.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 939