Хабарҳо
НОВОСИБИРСК
Намоиши филмҳои тоҷикӣ
Аз 23 то 26 августи соли ҷорӣ ба ифтихори Ҷашни 30 - солагии Истиқлолияти давлатии Ҷумҳурии Тоҷикистон масъулони фарҳанги шаҳри Новосибирски Федератсияи Россия филмҳои ҳунарии «Тоҷикфилм»-ро дар ҳама муассисаҳои фарҳангӣ ба намоиш гузоштанд.
Дар ин муддат филмҳои «Қисмати шоир», «Ман бо духтаре вохӯрдам», «Оинаи беҷило» ва «Духтарак аз «Суғдиёна» намоиш дода шуданд. Ин иқдом аз тарафи маркази фарҳангиву фароғатии «Победа» ва Консулгарии генералии Тоҷикистон дар Новосибирск роҳандозӣ шуд.
"ҚОНУНИ ТИБ" ЧОП ШУД
Сарредаксияи Энсиклопедияи миллии тоҷик орзуи деринаи миллати моро ҷомаи амал пӯшонд ва китоби ҳазорсолаи шайхурраис Абуалӣ ибни Сино "Қонуни тиб"- ро бо сатҳу сифати баланд аз чоп баровард.
Ин китоби бошукӯҳ, ки то аввали асри ХVI дастурамали тибби ҷаҳонӣ буд, бо дастгирии Пешвои миллат муҳтарам Эмомалӣ Раҳмон чоп шуда, армуғони арзанда барои доираҳои илмиву тиббии мамлакат дар остонаи 30-солагии Истиқлолияти давлатӣ гардид.
«ОХИРИН САЙДИ САЙЁД»-РО БА КРАСНОДАР МЕБАРАНД
Филми нави ҳунарии «Охирин сайди сайёд»-и Муассисаи давлатии «Тоҷикфилм», ки аз рӯйи асари адиби шинохта Аброри Зоҳир, бо коргардонии Муҳаммадрабии Исмоил рӯйи экран омад, дар озмуни филмҳои ҳунарии ХХХ Фестивали кушоди синамои кишварҳои ИДМ ва кинематографияи миллии «Киношок» иштирок мекунад.
Фестивал дар шаҳри Анапаи кишвари Краснодари Россия аз 25 сентябр то 2 октябри соли 2021 сурат мегирад.
Бузургмеҳри БАҲОДУР, «Ҷумҳурият»
Баёни ақида (0) Санаи нашр: №: Мутолиа карданд: 926