“Ҷумҳурият” дар татбиқи сиёсати фарҳангпарваронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳадафмандона пеш меравад. Он умри наздики садсола дошта, бонуфузтарин  нашрияи Тоҷикистони соҳибистиқлол маҳсуб меёбад. Ин рӯзномаи дӯстдоштаи мо дар солҳои охир бештар хонданиву ҷолиб гардидааст. Аз ҷумла, озмунҳои ҷумҳуриявӣ бахшида ба шахсиятҳои ҷонфидо ва қаҳрамонҳои  миллат ва ба табъ  расидани маводҳо дар бораи онҳо шоистаи таҳсин аст. Аз хондани ин гуна маводҳо ғуруру ифтихори миллӣ дар ниҳоди ҳар як шахс ҷӯш мезанад. Ман низ пешниҳоди дар шакли китоби алоҳида ба табъ расондани маводҳои озмуниро ҷонибдорӣ менамоям. Он як саҳифаи таърих хоҳад шуд ва, албатта, ба бедории миллӣ мусоидат хоҳад кард.

“Ҷумҳурият” на танҳо дар матбуоти тоҷик, балки, умуман, дар фарҳанги кишвар мактаби хоси худро соҳиб аст. Маҳсули андешаву эҷоди қаламкашони он дар байни хонандагон ҳаводорони зиёде доранд. 

Як нуктаи дигарро наметавонам сарфи назар намоям, ки ин саҳифаи “Шоми шанбе” мебошад. Хонандагони сершумори матбуоти тоҷик кайҳо боз ба чунин як саҳифаи маърифатию фароғатӣ ниёз доштанд ва он ба ҳаёти маънавии ҷомеа чун насими тозаву руҳафзо ворид гардид. “Шоми шанбе” торҳои асаби хасташудаи моро ҳалимона навозиш медиҳад... 

“Шоми шанбе”-ро дар саҳифаи рӯзнома дида, кас дар худ фароғату сабукие эҳсос мекунад. Он  беҳтарину гуворотарин ғизои маънавӣ барои мо – хонандагони сершумор мебошад. 

                          

Даврон ОХУНОВ, 

духтури Маркази назорати     

давлатии санитарию эпидемиологии 

ноҳияи Б. Ғафуров