Бо ташаббуси мақомоти Ваколатдор оид ба ҳуқуқи инсон дар Ҷумҳурии Тоҷикистон чанде пеш дар Китобхонаи миллӣ конфронси ҷумҳуриявӣ таҳти унвони «30 соли рушди ҳуқуқи инсон дар давраи Истиқлолияти давлатии Ҷумҳурии Тоҷикистон» баргузор гардид. Дар он намояндагони вазорату идораҳо ва созмонҳои байналмилалӣ ширкат доштанд.   

 

Умед Бобозода, ваколатдор оид ба ҳуқуқи инсон, дар ифтитоҳи чорабинӣ иброз дошт, ки имрӯз мардуми Тоҷикистон дар арафаи Ҷашни 30-солагии Истиқлолияти давлатӣ қарор доранд. Воқеан, даврони соҳибистиқлоли ба мо имкон фароҳам овард, ки роҳи имрӯзу ояндаи миллат ва пешрафти минбаъдаи кишвари азизамонро ба суйи ҷомеаи демократӣ, ҳуқуқбунёд ва дунявӣ интихоб намоем. 

- Қабул гардидани Конститутсияи Ҷумҳурии Тоҷикистон яке аз дастовардҳои муҳими даврони соҳибистиқлолии кишвар ба шумор меравад, ки ба рушди тамоми соҳаҳои ҳаёти ҷомеа, аз ҷумла ба таъмини воқеии ҳуқуқу озодиҳои инсон ва шаҳрванд, инчунин, адолати иҷтимоӣ асос гузоштааст. Дар Конститутсия таъмини ҳуқуқу озодиҳои инсон ва шаҳрванд арзиши олӣ эътироф гардида, рушду ҳимояи онҳо аз ҷониби тамоми шохаҳои ҳокимият чун вазифаи муқаддаси давлатӣ шинохта шудааст, - гуфт Умед Бобозода.  

Зикр гашт, ки имрӯз Ҷумҳурии Тоҷикистон санадҳои зиёди байналмилалӣ дар самти таъмини ҳуқуқу озодиҳои инсон, аз қабили Эъломияи умумии ҳуқуқи башар, паймонҳои байналмилалии ҳуқуқи шаҳрвандӣ, сиёсӣ, иқтисодӣ, иҷтимоӣ, фарҳангиро пазируфта, ба конвенсияҳои байналмилалӣ дар бораи ҳуқуқҳои маъюбон, занон, кӯдакон ҳамроҳ гашта, уҳдадориҳои худро дар заминаи ин санадҳои меъёрии ҳуқуқӣ пурра иҷро менамояд.

Дар идомаи конфронс Фирӯз Орзузода, муовини сардори раёсати кафолатҳои ҳуқуқи инсони Дастгоҳи иҷроияи Президенти Ҷумҳурии Тоҷикистон, Мавлудахон Зайнӣ, вакили Маҷлиси намояндагон, Пратибҳа Меҳта, роҳбари Барномаи рушди СММ дар Тоҷикистон, Осама Маккавӣ, роҳбари намояндагии Хазинаи кӯдакони СММ дар Тоҷикистон, Мэрилин Йосефен, сафир, роҳбари намояндагии Иттиҳоди Аврупо дар Тоҷикистон ва дигарон суханронӣ карданд.  

 

М. БАҲРОМ, «Ҷумҳурият»