Бахшида ба Ҷашни 30 - солагии Истиқлоли давлатӣ бо ташаббуси Кумитаи иҷроияи Ҳаракати Ваҳдати миллӣ ва эҳёи Тоҷикистон оид ба «Нақши китоби «Ваҳдат, Давлат, Президент» дар ташаккули худшиносии миллӣ» ва рӯнамоии ҷилди 33-юми он бо иштироки доираи васеи муҳаққиқон ва дӯстдорони каломи бадеъ ҳамоиш доир гардид. 

Рудобаи Мукаррам, раиси Кумитаи иҷроияи Ҳаракати Ваҳдати миллӣ ва эҳёи Тоҷикистон ҳамоишро ифтитоҳ намуда, зикр дошт: «Нақши Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар таҳкиму тақвият бахшидани Ваҳдати миллӣ ва дар рушду ташаккули истиқлоли миллӣ назаррас мебошад. Ҳадаф аз ҳамоиш низ муаррифӣ ва тавзеҳи мавзуъҳои китоби «Ваҳдат, Давлат, Президент» мебошад».

Ноиби президенти Академияи миллии илмҳои Тоҷикистон Муҳаммад Абдураҳмон дар мавзуи «Ваҳдат омили асосии рушди ҷомеа» маъруза намуда, аз ҷумла гуфт: «Ваҳдати миллии мо тоҷикон дар Осиёи Марказӣ ва ҷаҳони муосир  такони ҷиддӣ ба миён овард, имрӯз онро чун намунаи ибрат сармашқи кори худ қарор додаанд». 

Зикр шуд, ки ваҳдати миллӣ барои тамоми давлатҳо муҳимтарин арзиш маҳсуб шуда, омили асосии  рушди ҷомеа ва кафолати зиндагии шоистаи мардум аст. Фарҳанги сулҳи тоҷикон барои дигарон намунаи ибрат буда,  аз ҷониби Созмони Милали Муттаҳид ҳамчун таҷрибаи нодир эътироф гардид. Хиради зотии халқи мо, ки  дар таърих ҳамеша бо сулҳпарварӣ, башардӯстиву инсонгарӣ ном баровардааст, боло гирифту тоҷикон ба ваҳдат омада, имрӯз сарҷамъона  барои ободии давлати худ талош доранд.

Таъкид гардид, ки мафҳуми ваҳдати миллӣ ифодагари ормонҳои миллӣ, осоишу ободӣ,   амну субот ва меҳру садоқат ба миллату сарзамин мебошад. Ҳамзамон, дар идомаи ҳамоиш аз ҷониби иштирокчиён «Китоби «Ваҳдат, Давлат, Президент» - истеҳкомбахши ҳувияти миллӣ», «Ҷаҳонишавӣ ва пайомадҳои хатарзои он», «Нақши китоби «Ваҳдат, Давлат, Президент» дар шароити асолати миллӣ», «Арзёбии назариявӣ ва методологии ташаккули мактаби давлатдории миллии тоҷикон зери роҳбарии Эмомалӣ Раҳмон» ва дигар маърузаҳо ироа гардиданд.

Дар хотимаи ҳамоиш бахшида ба 30-солагии Истиқлоли давлатӣ ва барои ҳамкории судманд бо Ҳаракати Ваҳдати миллӣ ва эҳёи Тоҷикистон ба як гурӯҳ фаъолон Сипоснома тақдим гардид.

 

Лола РИЗОӢ, «Ҷумҳурият»