сиёсат
МУЛОҚОТИ ЭМОМАЛӢ РАҲМОН БО ҲАЙКО МААС
30 августи соли 2021 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вазири Федералии корҳои хориҷии Олмон Ҳайко Маасро ба ҳузур пазируфтанд.
Зимни мулоқот ҷонибҳо ҳамкориҳои дуҷонибаи Тоҷикистон ва Ҷумҳурии Федеративии Олмон, мавзуъҳои мубрами рӯзномаи минтақавӣ ва байналмилалиро матраҳ намуданд.
Вазъи пурпечутоб ва ташвишовари Афғонистон меҳвари гуфтугӯ байни ҷонибҳо буд.
Президенти Ҷумҳурии Тоҷикистон бори дигар роҷеъ ба вазъи мураккаб дар Афғонистон ва таъсири он ба минтақаи Осиёи Марказӣ изҳори ташвиш карда, назари кишвари моро ба ҳолати кунунӣ ва пайомадҳои он иброз доштанд.
Президенти Ҷумҳурии Тоҷикистон зикр карданд, ки яке аз омилҳои ба эътидол омадани вазъ дар Афғонистон ин таъсиси ҳукумати фарогир бо иштироки намояндагони тамоми гурӯҳҳои этникӣ мебошад.
Сарвари кишвар бо такя ба нақши СММ таъкид карданд, ки таҳти сарпарастии ин Созмон ва иштироки фаъоли ҷомеаи ҷаҳонӣ ба ташаккули ҳукумати фарогир дар Афғонистон тадбирҳои зарурӣ андешида шаванд.
Ба андешаи Президенти Ҷумҳурии Тоҷикистон дар ин ҳолати ниҳоят мушкил, мамлакатҳои қудратманд бояд бетарафиро пеша накунанд ва барои истиқрори вазъ дар ҳамсоякишвар кӯшиш ба харҷ диҳанд, дар акси ҳол Афғонистон метавонад ба ҷанги шаҳрвандии тулонӣ кашида шавад.
Президенти Ҷумҳурии Тоҷикистон даъват карданд, ки бо назардошти буҳрони иқтисодиву иҷтимоӣ ба мардуми Афғонистон мусоидати ҳаматарафаи мақсаднок расонда шавад.
Ҳамзамон, ба расондани кумак дар таҳким ва ҳимояи марз миёни Ҷумҳурии Тоҷикистон ва Афғонистон аз ҷониби Ҷумҳурии Федеративии Олмон ва ҷомеаи байналмилалӣ таваҷҷуҳ зоҳир карда шуд.
Ҷонибҳо аз эҳтимоли мубаддал гардидани Афғонистон ба пойгоҳи террористони байналмилалӣ изҳори нигаронӣ карда, омодагии хешро барои мубориза бо терроризм, ифротгароӣ ва ҷинояткории фаромиллӣ изҳор доштанд.
Вазири федералии корҳои хориҷии Олмон дар муътадил намудани вазъ тавассути гуфтушунидҳо ва таъсиси ҳукумати фарогир мусоидат намуданро иброз намуд.
Баёни ақида (0) Санаи нашр: 31.08.2021 №: 173 Мутолиа карданд: 731