ОДАМКУШӢ

Қасд ба ҷони бародар Муҳаммадшоро  20 сол паси панҷара бурд

Бо ҳукми коллегияи судӣ оид ба парвандаҳои ҷиноятии Суди Олии Ҷумҳурии Тоҷикистон шаҳрванд Муҳаммадшо Биглюнов бо айби одамкушӣ (моддаи 104 қисми 2 бандҳои «в,е» Кодекси ҷиноятӣ) 20 сол аз озодӣ маҳрум карда шуд.

Тавре маркази матбуоти Прокуратураи генаралӣ иттилоъ медиҳад, маҳкумшуда моҳи апрели соли ҷорӣ қасд ба ҷони бародараш Рамазон Биглюнов намуда, ӯро дар манзили истиқоматиаш бо 10 зарби корд ба ҳалокат расондааст. Бино ба гузориши манбаъ, теғи аҷал замоне ба ҷисми Р. Биглюнов бархӯрд, ки ӯ дар ҳолати оҷизӣ, яъне дар ҳолати хоб қарор доштааст. Моҷаро бар асари аз хона рондани падари бародарон аз ҷониби Рамазон Биглюнов ба бор омода, боиси хашм ва дар ниҳоят содир кардани ҷинояти вазнин аз ҷониби Муҳаммадшо Биглюнов гардидааст.

Бар пояи ҳукми суд, М. Биглюнов муҳлати адои ҷазоро дар муассисаи ислоҳии дорои низоми сахт сипарӣ хоҳад кард.

 

 

ТАСАРРУФИ 60830,26 СОМОНӢ  АЗ ҶОНИБИ МУҲОСИБЕ, КИ ДАР КОФТУКОВ ҚАРОР ДОРАД

Агентии назорати давлатии молиявӣ ва мубориза бо коррупсияи Ҷумҳурии Тоҷикистон нисбат ба Темур Муллоев ғоибона айб эълон намуд. 

Дар ин бора маркази матбуоти агентӣ хабар дод. Тибқи иттилои манбаъ, Темур Муллоев, муҳосиби музди меҳнати Раёсати хоҷагии манзилию коммуналӣ ва сохтмонии шаҳри Ваҳдат, дар давраи фаъолияти кориаш бо роҳи сохтакории ҳуҷҷатҳои муҳосибӣ 60830,26 сомониро бо роҳи азонихудкунӣ тасарруф кардааст.

Дар робита ба он, ки номбурда аз ҷавобгарии ҷиноятӣ ва тафтишоти пешакӣ пинҳон шуда, феълан ҷойи буду бошаш маълум нест, нисбат ба ӯ тибқи моддаҳои 245 қисми 3 банди «а» (азонихудкунӣ ё исрофкорӣ) ва 323 (сохтакории хизматӣ)-и Кодекси ҷиноятӣ ғоибона айб эълон шуда, ҳоло дар кофтуков қарор дорад.

  

 

ДУЗДӢ

Гумонбар ба даст афтод

Кормандони мақомоти корҳои дохилӣ дар ноҳияи Ҷалолиддини Балхӣ марди 38-солаеро боздошт намуданд, ки ба содир кардани ҷиноятӣ дуздӣ гумонбар дониста мешавад.

Тибқи иттилои сомонаи Вазорати корҳои дохилӣ, марди дастгиршуда 29 августи соли 2021 бо роҳи пинҳонӣ вориди манзили истиқоматии як сокини Ҷамоати шаҳраки Балхии ноҳия шуда, 10 ҳазор сомонӣ дуздидааст.

Айни ҳол, аз рӯйи ин ҳодиса тафтишот идома дорад. 

 

Шуъбаи ҳуқуқи рӯзномаи «Ҷумҳурият»