Тоҷикистонро 80 варзишгар муаррифӣ мекунад

Тибқи иттилои Кумитаи кор бо ҷавонон ва варзиш, дар I Бозиҳои кишварҳои ИДМ – 2021 (4 – 11 сентябр, Қазон, Федератсияи Россия) Тоҷикистонро 80 варзишгар аз рӯйи 12 намуди варзиш намояндагӣ мекунад. 

Дар бозиҳо 1500 варзишгар аз 10 кишвар – Арманистон, Беларус, Қазоқистон, Қирғизистон, Молдова, Озарбойҷон, Россия, Тоҷикистон, Туркманистон ва Узбекистон ширкат хоҳад кард. Синни иштирокчиён аз 14 то 23 муайян шудааст.

Варзишгарон барои 184 маҷмуи медалҳо аз рӯйи 16 намуди варзиш: бадминтон, баскетбол (3х3), бокс, гӯштии камарбандӣ, дзюдо, каратэ, кураш, тенниси рӯйи миз, тирпаронӣ, тирпаронии қурс, самбо, гуштии варзишӣ, камонварӣ, муайтай, рақси варзишӣ, футзал ва гимнастикаи бадеӣ сабқат хоҳанд кард. 

 

БОКС 

15 медали варзишгарони тоҷик аз Чемпионати Осиё

Боксёрони тоҷик дар Чемпионати Осиё оид ба бокс миёни наврасону ҷавонон (Дубай, АМА) 15 медал (нуқра ва 14 биринҷӣ) ба даст оварданд.

Ягона медали нуқраро Руслан Ғафуров миёни наврасон соҳиб шуд. Анушервон Файзов, Бузургмеҳр Иксанов, Шаҳбоз Додоҷонов, Муҳаммад Ҷаборов, Юсуф Фозилов, Нурланбек Эрматов, Акмалҷон Абдувалиев, Бибиҷон Музаффарова (байни наврасон), Акбаралӣ Абдураҳмонзода, Искандарбек Рустамов, Абубакр Муродов, Абдураҳим Ёқубов, Сироҷиддин Ҳоҷибоев, Дурандеш Зубайдов (миёни ҷавонон) соҳиби медалҳои биринҷӣ гардиданд. 

 

Роналду рекорди таърихӣ гузошт

Криштиану Роналду рекорди ҷаҳонӣ гузошт. Ӯ пас аз оне ки ба дарвозаи мунтахаби Ирландия ду тӯб ба самар расонд, шумораи голҳояш дар ҳайати тими миллии Португалия ба 111 расид. 

Рекорди қаблӣ ба номи футболбози мунтахаби Эрон Алӣ Дойи (109 гол) сабт шуда буд.

Ёдовар мешавем, ки Криштиану Роналду аз соли 2003 инҷониб бо либосҳои тими миллии Португалия ҳунарнамоӣ мекунад. Ӯ бо мунтахабаш чемпиони Аврупо (соли 2016) ва Лигаи Миллатҳо (2019) шудааст. 

 

Маҳмуд БАҲРОМ, 

шореҳи варзиш