Хабарҳо
Ифтитоҳи ду иншооти ҷашнӣ аз ҷониби Рустами Эмомалӣ
1 сентябр раиси шаҳри Душанбе Рустами Эмомалӣ дар кӯчаи Варзоби ноҳияи Исмоили Сомонӣ кӯдакистон ва Литсейи хусусии «Адолат»-ро мавриди баҳрабардорӣ қарор дод.
Бинои кӯдакистон аз се ошёна иборат буда, барои ба таълиму тарбия фаро гирифтани 360 кӯдак пешбинӣ шудааст ва дар он имкони ҷойгир намудани 14 гурӯҳ бо шумораи 260 кӯдак ва 100 нафар дар 5 гурӯҳи омодагӣ ба мактаб фароҳам аст.
Кӯдакистон дорои 8 синфхонаи таълимӣ, 6 синфхонаи таълимии ёрирасон барои зергурӯҳҳо, ҳуҷраҳои кории маъмурият ва табибон, 14 ҳуҷраи хоб бо 280 кат, ошхона барои гурӯҳҳои тайёрӣ ба мактаб бо 60 ҷойи нишаст, толори фарҳангӣ бо 120 ҷойи нишаст ва толори варзишӣ аст, ки дар онҳо шароити мусоид фароҳам мебошад.
Бинои литсейи «Адолат» аз се ошёна иборат буда, барои ба таҳсил фаро гирифтани 528 хонанда пешбинӣ гардидааст. Он дорои 28 синфхона аст.
Дар литсей, ҳамчунин, 4 ҳуҷраи корӣ барои маъмурият, 2 хонаи омӯзгорон, китобхона, ошхона барои 112 ҷойи нишаст, толори фарҳангӣ бо 210 ҷойи нишаст ва майдончаи болопӯшидаи варзиш мавҷуданд.
Густариши ҳамкориҳои Тоҷикистон ва Россия дар соҳаи тиб
Вазири тандурустӣ ва ҳифзи иҷтимоии аҳолӣ Ҷамолиддин Абдуллозода бо роҳбари Хадамоти федералии назорат ва ҳифзи ҳуқуқи истеъмолкунандагон ва некуаҳволии инсон “Роспотребнадзор”-и Федератсияи Россия Анна Юревна Попова мулоқоти онлайнӣ анҷом дод.
Дар суҳбат масъалаҳои табодули таҷрибаи табибони ду кишвар дар самти ташхису табобат ва пешгирии бемориҳои сироятӣ, махсусан бемории сироятии коронавирус ва дигар бахшҳои соҳа, мавриди баррасӣ қарор дода шуданд. Ҷонибҳо ҳавасмандии хешро ҷиҳати тақвияти ҳамкориҳои мутақобилан судманд иброз намуданд.
Мулоқоти муштарак миёни Тоҷикистон, Туркманистон ва Австрия
Мулоқоти муштараки фосилавӣ миёни мақомоти дахлдори давлатии Ҷумҳурии Тоҷикистон, Туркманистон ва Ҷумҳурии Австрия баргузор гардид. Бино ба маълумоти Вазорати корҳои хориҷӣ Тоҷикистонро дар мулоқоти мазкур вазири корҳои дохилӣ Рамазон Раҳимзода намояндагӣ кард.
Дар мулоқот, ҳамчунин, намояндагони воломақоми ниҳодҳои марбутаи Ҷумҳурии Федеративии Олмон, Ҷумҳурии Юнон ва Шоҳигарии Дания низ иштирок намуданд. Ҷонибҳо вобаста ба вазъ дар Афғонистон ва минтақаи Осиёи Марказӣ табодули афкор намуда, ҷиҳати таҳким ва тавсеаи ҳамкорӣ дар чорчӯбаҳои минтақавӣ ва байналмилалӣ ба мақсади таъмини амният изҳори омодагӣ карданд.
Як ҷаласаи муҳим
Дар шаҳри Душанбе ҷаласаи якуми гурӯҳи кории байниидоравӣ оид ба маблағгузории Стратегияи миллии рушд барои давраи то соли 2030 ва Ҳадафҳои Рушди Устувор дар назди Шурои миллии рушди назди Президенти Ҷумҳурии Тоҷикистон дар ҳамкорӣ бо намояндагии Барномаи рушди Созмони Милали Муттаҳид баргузор гардид.
Дар ҷаласа масъалаҳои фаъолияти гурӯҳи корӣ, тадбирҳои минбаъда бо мақсади муайян намудани механизму равишҳои нави маблағгузории афзалиятҳои кишвар, ҳадаф ва вазифаҳо, уҳдадориҳои аъзои гурӯҳи корӣ аз ҳисоби мақомоти давлатӣ, шарикони рушд, бахши хусусӣ ва ташкилоти ҷамъиятӣ мавриди баррасӣ қарор гирифтанд.
Роҳи мошингарди Ҳулбук – Темурмалик – Кангурт сохта мешавад
Роҳи мошингарди Ҳулбук – Темурмалик – Кангурт аз ҷониби ширкати чинии «China State Construction Xinjiang Construction Engineering Group Co» сохта мешавад, - иттилоъ расид аз Вазорати нақлиёт.
Дар робита ба ин, дар Душанбе ҷиҳати татбиқи лоиҳаи сохтмони роҳи мошингарди Ҳулбук – Темурмалик – Кангурт байни Вазорати нақлиёти Тоҷикистон ва ширкати «China State Construction Xinjiang Construction Engineering Group Co» қарордод ба имзо расид. Санадро вазири нақлиёти Тоҷикистон Азим Иброҳим ва намояндаи ширкати чинии мазкур имзо карданд.
Лоиҳаи сохтмони роҳи мошингард аз ду марҳила иборат буда, марҳилаи якум: Ҳулбук – Темурмалик 33,4 км, марҳилаи дуюм Темурмалик – Кангурт 25,17 км-ро дар бар мегирад.
Баёни ақида (0) Санаи нашр: №: Мутолиа карданд: 921