Дар шаҳри Левакант филиали Донишкадаи сайёҳӣ, соҳибкорӣ ва хизмат ба фаъолият шуруъ кард. Чуноне иҷрокунандаи директори филиали донишкада Шарифхон Баротзода хабар дод, тибқи Қарори Ҳукумати Ҷумҳурии Тоҷикистон аз 30 июли соли 2021 таҳти рақами 301 дар вилоятҳои Хатлон ва Суғд филиали донишкадаи мазкур ифтитоҳ ёфт.

 

Филиали донишкада дар вилояти Хатлон дар яке аз биноҳои таълимии Муассисаи давлатии таълимии “Литсейи касбии саноатии кимиё”-и шаҳри Левакант ба кор шуруъ кард. Тибқи шартномаи Донишкадаи саёҳӣ, соҳибкорӣ ва хизмат ва Вазорати меҳнат, муҳоҷират ва шуғли аҳолӣ яке аз биноҳои таълимии литсейи номбурда ба муҳлати 10 сол ба иҷора гирифта шудааст. Мувофиқи нақша сохтмони бинои таълимии филиал дар қабати ҳамин литсей шуруъ шуда, тибқи нақша соли 2022 бояд ба истифода дода шавад. Он аз 7 ошёна иборат буда, аз ҳисоби маблағҳои худи донишкада сохта мешавад.

- Бо сабабе, ки корҳои ташкилӣ ва ҳуҷҷатгузорӣ каме дертар ба итмом расид, Вазорати маориф ва илм иҷозат дод, ки имсол ба таври истисно бо шакли анъанавӣ довталабонро қабул кунем. Нафароне, ки тариқи Маркази миллии тестӣ натавонистанд ба донишгоҳу донишкадаҳои олӣ дохил шаванд, метавонанд бахти худро дар филиали мо бисанҷанд. Мо имсол тариқи суҳбат довталабонро қабул хоҳем кард”, - гуфт Шарифхон Баротзода.

Қабули довталабон аз рӯи 10 ихтисос шуруъ гардида, 500 донишҷӯ бояд ба омӯзиш фаро гирифта шавад.

 

Зокир ҲАСАН, “Ҷумҳурият”