Театри давлатии академии опера ва балети Тоҷикистон ба номи Садриддин Айнӣ ба рӯйхати 10 театри беҳтарини операи ИДМ ворид шуд. Дар ин бора агентии ТурСтат (http://turstat.com) иттилоъ медиҳад.

Таҳқиқот доир ба нуфузи театрҳо ва пешниҳоди намоишҳо ба таври бархат (онлайн) гузашта, даҳгонаи беҳтарини театрҳои операро дар ИДМ муайян кард.

Ба даҳгонаи мазкур, инчунин, театрҳои кишварҳои Россия, Беларус, Қазоқистон, Озарбойҷон, Арманистон, Узбекистон ва Молдова ворид шуданд.

 

“БИБЛИОМАРАФОН” ҶАМЪБАСТ МЕГАРДАД

Даври ҷамъбастии Озмуни ҷумҳуриявии “Библиомарафон” таҳти унвони “Ҳамнишине нест беҳтар аз китоб” 4 сентябри соли равон дар Китобхонаи давлатии бачагонаи ҷумҳуриявии ба номи Мирсаид Миршакар баргузор мегардад.

Вазорати фарҳанг иттилоъ дод, ки ин озмун аз моҳи май то август идома ёфта, кӯдакону наврасони донову зиракро гирди ҳам овард.

 

ДУШАНБЕ: БА БАРНОМАҲОИ КОНСЕРТӢ БИЁЕД!

Чорабиниҳои маърифатӣ ва барномаҳои консертӣ дар боғҳои фарҳангӣ - фароғатии пойтахт ба ифтихори Ҷашни 30-солагии Истиқлоли давлатӣ идома доранд.

То имрӯз барномаҳои ҳунарии ҳаваскорони шаҳру навоҳии ҷумҳурӣ иборат аз суруду таронаҳои ватандӯстона ва рақсҳои руҳнавозу дилнишин бо як шукӯҳи тоза баҳри фароғати меҳмонону сокинони пойтахт манзур гардид.

Имрӯзҳо барномаҳои фарҳангии чор ноҳияи пойтахт ҷараён дошта, то рӯзи 9 сентябр идома меёбанд. Сарраёсати фарҳанги пойтахт аз сокинон даъват ба амал меорад, ки дар чунин шомҳои хотирмони идона ширкат варзанд.

 

Бузургмеҳри БАҲОДУР, «Ҷумҳурият»