Ба муносибати 30 - солагии Истиқлоли давлатии Ҷумҳурии Тоҷикистон дар Ҳиндустон шумораи махсуси маҷаллаи “Business Central Asia” ба нашр расид. Дар он мақолаи Президенти Ҷумҳурии Тоҷикистон муҳтарам Эмомалӣ Раҳмон таҳти унвони «20 соли СҲШ: ҳамкорӣ баҳри субот ва шукуфоӣ», паёми раиси шаҳри Душанбе Рустами Эмомалӣ, инчунин, маълумот доир ба дастовардҳои сиёсӣ, иқтисодию иҷтимоии Тоҷикистон дар даврони истиқлол ва чорабиниҳои сиёсии байналмилалӣ, ки тайи соли ҷорӣ дар Душанбе доир гардиданд, чоп шуданд.

Инчунин, дар маҷалла мақолаҳои алоҳида доир ба иқдомҳои глобалии Тоҷикистон дар соҳаи мудирияти захираҳои об ва ҳифзи пиряхҳо, робитаҳои дуҷониба байни кишварҳои ба ҳам бародари Тоҷикистону Ҳиндустон ҷой гирифтаанд. 

Дар бахши фарҳанг оид ба ҳаёту фаъолияти Қаҳрамони  Тоҷикистон Мирзо Турсунзода, ки ҷиҳати тақвияти пайвандҳои адабию фарҳангии ду кишвар саҳми бузург гузоштааст, матлаберо ҷой додаанд.

 

 

Сафири Тоҷикистон ба  Президенти Туркия эътимоднома супурд

Сафири фавқулода ва мухтори Ҷумҳурии Тоҷикистон дар Ҷумҳурии Туркия Ашрафҷон Гулов ба Президенти Туркия Раҷаб Тайиб Эрдуғон эътимоднома супурд. Дар ин бора Вазорати корҳои хориҷӣ хабар дод.

Сафири Тоҷикистон таманниёти неки Асосгузори сулҳу ваҳдати миллӣ - Пешвои миллат, Президенти  Ҷумҳурии  Тоҷикистон  муҳтарам Эмомалӣ Раҳмонро ба Президенти Туркия Раҷаб Тайиб Эрдуғон расонд.

Дар суҳбат масъалаҳои рушди ҳамкории дуҷониба ва бисёрҷонибаи Тоҷикистон ва Туркия мавриди баррасӣ қарор гирифтанд.

 

Лашкар ШАРИФЗОДА, "Ҷумҳурият"