Хабарҳо
ТАҶЛИЛИ 30-СОЛАГИИ ИСТИҚЛОЛ ДАР БМТ
Дар Бонки миллии Тоҷикистон таҳти роҳбарии раиси Бонки миллии Тоҷикистон Ҳоким Холиқзода, бо иштироки директори Маркази исломшиносӣ дар назди Президенти Ҷумҳурии Тоҷикистон Абдураҳим Холиқзода бахшида ба 30-солагии Истиқлоли давлатии Ҷумҳурии Тоҷикистон чорабинии идона доир гардид.
Ҳоким Холиқзода аҳли нишастро бо ҷашнвораи бузург - 30-юмин солгарди Истиқлоли давлатии Ҷумҳурии Тоҷикистон табрик гуфта, онро волотарин ва пурарзиштарин дастоварди давлату миллати тоҷик унвон кард, ки бо талошу заҳматҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба даст омадааст.
- Истиқлол нишони барҷастаи пойдории давлат, бақои миллат, рамзи асолату ҳувият, шиносномаи байналмилалӣ ва шарафу эътибори ба ҷаҳони мутамаддин пайвастани кишвари соҳибтамаддуни Тоҷикистон мебошад. Ифтихор аз он дорем, ки сӣ сол қабл бо роҳнамоии фарзанди фарзонаи миллат ва Сарвари тоҷикони ҷаҳон Эмомалӣ Раҳмон нахустин хиштҳои пойдевори истиқлоли воқеӣ ва давлатдории миллии худро ниҳода, ормонҳои ҳазорсолаи халқи тоҷикро ба воқеият табдил додем. Имрӯз ба шарофати Истиқлоли давлатӣ имкон фароҳам гардид, ки роҳи ислоҳоти иқтисодӣ, ташаккули иқтисодиёти миллӣ ва сохторҳои нави идоракуниро пеш гирифта, низоми иқтисоди Тоҷикистонро ба набзи иқтисоди ҷаҳонӣ пайваст намоем ва ба ин васила рушди босуботи кишварро таъмин созем, - иброз дошт Ҳоким Холиқзода.
Директори Маркази исломшиносӣ дар назди Президенти Ҷумҳурии Тоҷикистон Абдураҳим Холиқзода зикр кард, ки Истиқлол ба мо имконияти таърихие фароҳам овард, то Ватани худро соҳибӣ кунем, давлатдории миллии худро барпо намоем, суннату арзишҳои миллиамонро эҳё созем, ормонҳои деринаи халқамонро амалӣ гардонем ва зиндагии озодонаи мардумамонро ба роҳ монем.
Мо ифтихор аз он дорем, ки миллати тоҷик таърихан ва табиатан фарҳангпарвар, офарандаи ганҷинаҳои тамаддуни башарӣ, созанда, бунёдкор мебошад ва ин сифатҳои олиро аз насл ба насл мерос гузошта, дар тарихи навини халқамон саҳифаҳои заррину дурахшонро эҷод мекунад, ки ҳамаи ин комёбиҳо аз сиёсати хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маншаъ мегирад, - иброз дошт Абдураҳим Холиқзода.
Дар ин ҳамоиш як қатор кормандони фаъоли Бонки миллии Тоҷикистон ва шуъбаҳои минтақавии он бо нишони Аълочии Бонки миллии Тоҷикистон, Ифтихорнома ва Сипосномаи Бонки миллии Тоҷикистон қадр гардиданд.
Муҳаммадзоиршо ШАРИФЗОДА,
«Ҷумҳурият»
Баёни ақида (0) Санаи нашр: №: Мутолиа карданд: 1003