Истиқлолияти давлатӣ барои ҳар як шаҳрванди озодихоҳ арзиши олӣ ба шумор рафта, азизтарин неъмати дунё, рукни асосии давлати озод, рамзи шарафу номуси ватандорӣ, кафолати хонаи ободу сари баланди мо мебошад.

 

Ин нукта дар конфронси ҷумҳуриявии илмӣ - амалӣ  таҳти унвони “Судҳои иқтисодӣ дар меҳвари истиқлолият ислоҳоти судӣ - ҳуқуқӣ, баамалбарории адолати судӣ дар асоси баробарҳуқуқии тарафҳо ва мубоҳиса”, ки чанде пеш бо ташаббуси Суди Олии иқтисодӣ дар Китобхонаи миллии Тоҷикистон баргузор гардид, таъкид шуд. 

Дар конфронс намояндагон аз Дастгоҳи иҷроияи Президенти Ҷумҳурии Тоҷикистон, Маҷлиси намояндагон, Суди  конститутсионӣ, Суди  Олӣ, Прокуратураи генералӣ, Маркази миллии қонунгузорӣ, собиқадорону олимони соҳаи ҳуқуқ, Иттифоқи адвокатҳои Ҷумҳурии Тоҷикистон ва ҷомеаи шаҳрвандӣ ҳузур доштанд.

Мавлуда Қаландарзода, раиси Суди Олии иқтисодӣ, зимни суханронии ифтитоҳӣ изҳор дошт, ки замони Истиқлолияти давлатӣ ба мақомоти судӣ ҳамчун сохтори калидӣ дар масоили риоя ва ҳифзи ҳуқуқу озодиҳои инсон ва шаҳрванд аҳамияти махсус зоҳир гардида, бо қабули санадҳои дахлдори ҳуқуқӣ ба ислоҳоти судиву ҳуқуқӣ замина гузошта шуд. Тавассути ислоҳот дар низоми судӣ судҳои конститутсионӣ, ҳарбӣ ва иқтисодӣ таъсис ёфтанд. Яъне, судҳои иқтисодӣ самараи Истиқлолияти давлатӣ мебошад.  

Содиқ Шоназаров, мушовири калони бахши Ёрдамчии Президенти Ҷумҳурии Тоҷикистон оид ба масъалаҳои ҳуқуқӣ, гуфт, ки дар даврони Истиқлолияти давлатӣ дастгириҳои пайвастаи Пешвои миллат нисбат ба ҳокимияти судӣ ва ба таври васеъ ҷонибдорӣ намудани пешниҳодҳо вобаста ба ислоҳоти судӣ эҳсос мегардад. То ба имрӯз бо мақсади таъмини мустақилияти суд, такмили сохтори судӣ, баланд бардоштани нақши суд дар ҳифзи ҳуқуқу озодиҳои инсон ва шаҳрванд бо фармонҳои Президенти Ҷумҳурии Тоҷикистон чаҳор барномаи ислоҳоти  судӣ - ҳуқуқӣ (барои солҳои 2007 – 2010, 2011 – 2013, 2015 – 2017 ва 2019 – 2021) ба тасвиб расида, бо татбиқи ин барномаҳо дар сохтори судӣ дигаргуниҳои куллӣ ба миён омад. Инчунин, беҳтар гардондани вазъи иҷтимоии судяҳо, таъмини онҳо ба бинову таҷҳизоти муосир пайомади ислоҳоти судӣ - ҳуқуқӣ буда, тадбирандешӣ дар ин самт идома дорад.

Ҳамчунин, дар ҳамоиш Мавлудахон Мирзозода, вакили Маҷлиси намоядагон, Файзулло Абдуллоев, аввалин раиси Суди Олии иқтисодӣ, Ҷамшед Ҷамшедзода, судяи Суди конститутсионӣ, Саидбек Нуритдинов, раиси Иттифоқи адвокатҳои Ҷумҳурии Тоҷикистон ва дигарон маърӯза намуданд. 

 

Судобаи ФАЙЗАЛӢ, “Ҷумҳурият”