Бо мақсади сазовор пешвоз гирифтани Ҷашни 30-солагии Истиқлоли давлатии Ҷумҳурии Тоҷикистон ва иҷрои дастуру супоришҳои Сарвари давлат муҳтарам Эмомалӣ Раҳмон роҳбарияти маркази хизматрасонии маишии «Чорсӯ» дар маҳаллаи Тудакафши 2-и шаҳри Кӯлоб муассисаи таълимӣ барои хонандагони синфҳои ибтидоӣ мутобиқ ба талаботи замони муосир бунёд кард. 

 

Роҳбари марказ дар суҳбат иттилоъ дод, ки иншооти мазкур аз ду ошёна иборат буда, дорои 10 синфхонаи таълимӣ мебошад. Роҳравҳои мактаб сафолакпӯш гардида, дар гирду атрофи таълимгоҳ гулҳои мавсимӣ  шинонда шудааст. Муассиса дорои беш аз 600 ҷойи нишаст буда,  хонандагони синфҳои 1 – 4-ро дар ду баст ба таълим фаро мегирад.     

- Қаблан дар маҳалла умуман мактаб набуд. Фарзандон дар Муассисаи таълимии № - 27 таҳсил мекарданд, ки аз маҳалла 3 километр дур аст. Тайи чанд сол буд, ки ин мавзеъ ба партовгоҳ мубаддал гашта, як макони бесоҳиб буд. Мо аз иқдоми ин ашхоси саховатпеша хушҳолу хушнуд гаштем, - иброз дошт М. Раҷабова сокини маҳалла.

Дар назди муассиса толори варзиш, ошхона, майдончаи тобистонаи варзиш мутобиқ ба талаботи замони муосир сохта шудааст. Утоқҳои дарсӣ бо мизу курсии замонавӣ муҷаҳҳаз гардидааст. Атрофи таълимгоҳ панҷарабандӣ гардида, он бо оби нӯшоӣ таъмин шуд. Алҳол бунёди сохтмони буғхона идома дошта, баъди ба анҷом расидани корҳои сохтмонӣ тамоми синфхонаҳо дар фасли зимистон бо дастгоҳҳои гармидиҳӣ таъмин мегарданд. 

 

Суннати СОДИҚ, «Ҷумҳурият»