Чанде пеш китоби дуҷилдаи Шоири халқии Тоҷикистон Доро Наҷот «Фарҳанги Доро» интишор ёфт.

Мураттиб китобро ҳамчун луғатномаи барчидаи тафсирӣ ва решашинохтӣ муаррифӣ карда, ёдовар мешавад, ки дар нигориши фарҳанг аз осори донишмандони эронию тоҷик, мисли Муҳаммади Муъин, Алии Равоқӣ, Додихудо Саймиддинов, Амон Нуров, Масъуди Қосимӣ, Муҳтарам Ҳотам, Мирзоҳасан Султон баҳра бурдааст.

Ҷилди аввали он соли 2012 нашр шуда, панҷ ҳазор вожа, истилоҳ, таркиб ва ибораҳои забони форсии тоҷикиро фаро мегирифт. Ҳоло дар дуҷилдаи такмилёфта шумораи онҳо ба 12 ҳазор расид.

 

 

«ЭТЮД» БА АНАПА  МЕРАВАД

Филми ҳунарии «Этюд»-и «Тоҷикфилм», ки коргардонаш Муъмин Қодиров аст, дар озмуни филмҳои кӯтоҳи ХХХ Ҷашнвораи синамои кишварҳои ИДМ ва кинематогарфияи миллии «Киношок» иштирок мекунад. 

Фестивал дар шаҳри Анапаи Россия аз 25 сентябр то 2 октябри соли ҷорӣ баргузор гардида, фарогири 30 филм аз кишварҳои олам мебошад.

 

 

«АРМУҒОНИ ХОСИЯТ»  НАШР ШУД

Ҳунарманди мардумии Тоҷикистон Хосияти Зарафшонӣ дар саҳифаи фейсбуки худ иттилоъ дод, ки дар арафаи Ҷашни 30-солагии Истиқлоли давлатӣ китоби таронаҳояш – «Армуғони Хосият» иборат аз 80 суруд рӯйи чоп омад.

Дар китоб сурудҳо якҷо бо нотаҳояшон сабт гардида, барои мухлисон, санъатшиносон ва донишҷӯёни риштаи фарҳангу ҳунар судманд аст.

- «Армуғони Хосият» ҳосили ранҷҳои қариб бистсолаи банда буда, дар мураттаб кардани он шогирдону ҳампешагон низ дасти мадад расондаанд, - изҳор доштааст Хосияти Зарафшонӣ.

 

Бузургмеҳри БАҲОДУР, «Ҷумҳурият»