Дурахши паҳлавонони тоҷик 

12 сентябр бахшида ба Ҷашни 30 - солагии Истиқлоли давлатии Ҷумҳурии Тоҷикистон дар «Наврӯзгоҳ» - и шаҳри Душанбе II Мусобиқаи байналмилалии гӯштии миллӣ «Гӯштигирӣ» баргузор гардид.

Дар қувваозмоиҳо паҳлавонони тоҷик маҳорати баланд нишон дода, дар чор вазн ғолиб гардиданд. Шоҳҷоизаҳоро аз кишвари мо Хайрандеш Муродзода (60 кг), Мирзоҷамил Рамазонов (70кг), Ҷаҳонгир Маҷидов (-90 кг) ва Темур Раҳимов (+90 кг)  ба даст оварданд. Дар вазни 80 кило пирӯзӣ насиби гӯштигири Узбекистон Умар Бозоров гардид.

Миёни бонувон бошад, Камила Бадурова (65 кг, Россия) пирӯз шуд.

Бояд гуфт, ки ғолибони вазнҳо соҳиби автомобил гардиданд. Ҳамчунин, барандагони медалҳои нуқра 3 ҳазор доллари ИМА ва биринҷӣ 1,5 ҳазор доллар гирифтанд. 

 

БОКС 

Тоҷикбача унвони қаҳрамониашро ҳимоя кард

Боксёри маъруфи тоҷик Муҳаммад-хӯҷа Ёқубов, ҳарифаш Кристиан Палма (Чили) - ро шикаст дода, боз унвони қаҳрамонии WBC International (дар вазни то 59 кг) - ро ҳимоя намуд. Бояд ишора кард, ки чилигӣ аз идомаи мубориза даст кашид.

Муҳаммадхӯҷа Ёқубов, дар раунди чорум пирӯз омад. Ҳамин тавр, ин боксёри тоҷик 18 набард ва 18 ғалаба дорад. 

 

ҶОМИ 

ТОҶИКИСТОН – 2021 

«Хуҷанд», «Эсхата» ва «Равшан» дар нимфинал

Тимҳои «Хуҷанд», «Эсхата» ва «Равшан» ба даври нимниҳоии Ҷоми Тоҷикистон оид ба футбол баромаданд. 

Дар даври 1/4 - финал «Хуҷанд» дар майдонаш бар «Хатлон» бо ҳисоби 1:0 пирӯз омад. 

Вақти асосии бозӣ миёни тимҳои «Истаравшан» ва «Эсхата» мусовӣ (1:1) хотима ёфта, дар силсилазарбаҳои 11-метра «Эсхата» ғолиб омаданд – 2:3. 

Дар вохӯрии дигар «Равшан» бо натиҷаи 2:1 бар КМВА ғалаба кард.

Ҳамин тавр, барои баромадан ба финал «Хуҷанд» бо «Равшан» ва «Эсхата» бо ғолиби ҷуфти «Истиқлол»/«Файзканд» неру месанҷанд.

 

Маҳмуд БАҲРОМ, шореҳи варзиш