Ба муносибати 30-солагии Истиқлоли давлатии Ҷумҳурии Тоҷикистон мақолаи сафири Ҷумҳурии Тоҷикистон дар Ҷумҳурии Федеративии Олмон Соҳибназар Ғайратшо дар маҷаллаи олмонии “Diplomatisches Magazin” зери унвони «Аз оғоз то кунун. Сӣ соли истиқлолият» интишор ёфт. Дар ин бора Вазорати корҳои хориҷӣ хабар медиҳад.

Дар мақола Соҳибназар Ғайратшо нахустин солҳои мустақилияти кишвар ва чолишҳои он замонро дар шакли руҷуи таърихӣ ба қалам дода, таваҷҷуҳи хонандаро ба дастовардҳои Тоҷикистон дар солҳои минбаъда, мароми боризи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар раванди истиқрори суботу ваҳдати миллӣ ва таъмини рушди фарогири иқтисодию иҷтимоӣ дар кишвар ҷалб карда, ҳадафҳои стратегии мамлакатро дар мисоли густариши муносибатҳои дуҷонибаи Тоҷикистон ва Олмон шарҳ додааст.

 

 

Мулоқот бо президенти иҷлоси 76-уми Маҷмаи умумии СММ

Намояндаи доимии Ҷумҳурии Тоҷикистон дар СММ Ҷонибек Ҳикмат бо президенти тозаинтихобшудаи иҷлоси 76 – уми Маҷмаи умумии СММ ҷаноби Абдулло Шаҳид мулоқот кард.

Зимни вохӯрӣ ҷонибҳо ташаббусҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар масъалаи обу иқлим, аз ҷумла Даҳсолаи байналмилалии амал “Об барои рушди устувор, солҳои 2018-2028” ва эълон намудани соли 2025 ҳамчун Соли байналмилалии ҳифзи пиряхҳо мавриди баррасӣ қарор дода, оид ба масъалаи амният дар минтақаи Осиёи Марказӣ, бавижа вазъи имрӯзаи амалиёти башардӯстӣ дар Афғонистон мубодилаи афкор карданд.

 

 

Ба Тоҷикистон 100 ҳазору 800 воя ваксинаи «AstraZeneca» ворид гардид

Аз ҷониби Олмон ба Тоҷикистон  100 ҳазору 800 воя ваксинаи «AstraZeneca» ҳамчун ёрии башардӯстона ворид гардид, - хабар медиҳад Вазорати тандурустӣ ва ҳифзи иҷтимоии аҳолӣ.

Кумаки мазкур дар доираи ҳамкории дуҷонибаи Тоҷикистон ва Олмон дар чаҳорчӯбаи механизми ҷаҳонии дастрасии одилона ба ваксинаҳои Созмонии ҷаҳонии тандурустӣ (COVAX) бар зидди бемории COVID-19 расонда шуд.

Маросими қабули ваксинаҳо дар Маркази ҷумҳуриявии иммунопрофилактикӣ бо иштироки намояндагони Вазорати тандурустӣ ва ҳифзи иҷтимоии аҳолӣ ва Сафорати Ҷумҳурии Федеративии Олмон дар Тоҷикистон  ва шарикони рушд баргузор гашт.

 

 

Россия пойгоҳи 201-умро бо танкҳои муосир тақвият медиҳад

- Хизматчиёни ҳарбии Пойгоҳи 201-уми низомии Россия, ки дар Тоҷикистон мустақар аст, то охири соли 2021 –ум 30 танки замонавӣ мегиранд, - гуфт сардори хадамоти зиреҳпӯши Округи марказии ҳарбӣ Ҳаниф Беглов. - Танки Т-72 Б3М хусусияти ҷангии такмилдодашуда дорад. 

Ҳамин тариқ, дар мошини ҷангӣ муҳофизати зиреҳи экипаж ва дастгоҳ баланд аст. Танк бо силоҳи муосиртар ва захираҳои афзоянда муҷаҳҳаз мебошад. Дар ин бобат Sputnik иттилоъ додааст.

Мошинҳои ҷангӣ, ҳамчунин, бо муҳаррики нав ва системаи коммуникатсионии зиддисадоии «Акведук» муҷаҳҳазанд. 

Мавриди зикр аст, ки иваз кардани танкҳо дар пойгоҳи низомӣ дар Тоҷикистон дар пасманзари тезутунд шудани вазъ дар Афғонистони ҳамсоя сурат мегирад.

 

 

 

КОРОНАВИРУС. Ғалаба наздик аст!

Давоми як шабонарӯзи охир дар мамлакат 9 ҳолати нави гирифторшавии шаҳрвандон ба бемории  коронавируси COVID-19 ба қайд гирифта шуда, 11 нафар пас аз муолиҷа шифо ёфт.

Дар маҷмуъ, аз аввали бақайдгирӣ то 12 сентябр  дар кишвар 17084 нафар гирифтори COVID-19 сабт ва аз ин шумора 16948 кас (99,2%) шифо ёфт. Аз ин беморӣ 124 нафар фавтидааст.

Дар ҳамин замина, Варзорати тандурустӣ ва ҳифзи иҷтимоии аҳолӣ аз тамоми шаҳрвандон даъват ба амал меорад, ки қоидаҳои беҳдоштию зиддиэпидемикӣ, аз ҷумла пӯшидани ниқоби тиббӣ, зуд-зуд шустани дастон ва фосилаи байниҳамдигариро қатъиян риоя намоянд.