Дар маркази иммунопрофилактикии ноҳияи Лахш маъракаи эмкунӣ зидди бемории сироятии COVID - 19 бо маром ҷараён дорад. Тибқи иттилои директори марказ Ҳалим Шарифов, дар ноҳия эмкунӣ алайҳи COVID - 19 аз 18 – май, яъне баробари ворид гардидани  640 воя ваксинаи «AstraZeneca» оғоз гардид.

- Дар марҳилаи аввал 550 нафар кормандони соҳаи тиб ва омӯзгорон ваксина шуданд. Дар марҳилаи дуюм бошад, 544 воя дастрас гардид, ки дар натиҷа, 408 нафар иммунизатсия шуданд.

Маротибаи дуюм моҳи июл 7995 воя ваксинаи «Модерна», ки истеҳсоли кишвари Амрико мебошад, ворид шуд. Кормандони марказ якҷо бо кормандони муассисаҳои кумаки аввалияи тиббию санитарии ноҳия 7611 нафарро иммунизатсия намуданд. Дар марҳилаи  дуюм бо 8445 воя 1953 нафар иммунизатсия шуданд. 

Ваксинаи «Синавак», ки истеҳсоли Чин мебошад, дар марҳилаи якум  10 000 воя ва дар даври дуюм 5 000 воя дастрас гардид. Айни замон дар марказҳои саломатӣ ва бунгоҳҳои тиббии ҷамоатҳои деҳоти ноҳияи Лахш эмгузаронӣ ба таври ихтиёрӣ ҷараён дорад», - иброз дошт  Ҳалим Шарифов.

Ёдовар шудан ба маврид аст, ки як сол пас аз оғози густариши ин бемории нав дар зиёда аз 30 кишвари ҷаҳон эмгузаронии гурӯҳҳои осебпазир оғоз ёфта, Тоҷикистон расман ба рӯйхати кишварҳои дархосткунандаи ваксина зидди сирояти COVID - 19 дар доираи механизми COVAX шомил гардид. Бо талошҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати Тоҷикистон бобати ҳифзи сиҳатии аҳолӣ аз давраи хуруҷи бемории COVID -19  4 миллиону 760 ҳазору 740 воя ваксина ба қаламрави ҷумҳурӣ ворид гардида, иқдоми мазкур ҳоло низ  идома дорад.

Сокинони ноҳияи дурдасти Лахш аз ғамхориҳои пайвастаи Ҳукумати кишвар, хосатан дар самти сари вақт дастрас намудани ваксинаи зидди бемории коронавирус, сипосгузоранд. Онҳо бо масъулияти баланд баҳри ҳифзи саломатии худ ва наздиконашон ба муассисаҳои тандурустии маҳалли зисти хеш муроҷиат намуда, ваксинаи зидди ин бемориро  гирифта истодаанд.

 

Дилшод АМИРОВ, «Ҷумҳурият»