Хабарҳо
I БОЗИҲОИ КИШВАРҲОИ ИДМ
Варзишгарони тоҷик 14 медал гирифтанд
Варзишгарони Тоҷикистон дар I Бозиҳои кишварҳои ИДМ 14 медал (7 нуқра ва 7 биринҷӣ) ба даст оварда, мақоми 7-умро касб карданд.
Дар ҳайати кишвар медалҳои нуқраро Нурланбек Эрматов (бокс), Муҳаммад Икромов, Мустафо Ахмедов (гӯштии тарзи озод), Фирӯз Мирзораҷабов (гӯштии юнонӣ-римӣ), Бибинишастамоҳ Холова (бокси таиландӣ), Хуршедшоҳ Каримзода, Ҳоҷиакбар Тошмуродов (кураш) сазовор гардиданд.
Нишонҳои биринҷӣ насиби Азизҷон Асламов (гӯштии юнонӣ-римӣ), Аминҷон Мавлонов, Ҷамшед Ҳасанов (ҷуфт, тенниси рӯйи миз), Ҷаҳонафрӯз Сулаймонов (самбо), Амонҷон Даминов (бокси таиландӣ), Фирӯзҷон Зиёев, Дилшод Қурбонов (гӯштии камарбандӣ) ва Қурбоналӣ Охунов (кураш) гаштанд. Аз рӯйи шумораи медалҳо варзишгарони Россия бо 215 медал (114 тилло, 42 нуқра, 59 биринҷӣ) мақоми аввалро касб карданд. Тими Узбекистон 91 (23- 32-36) ва Қазоқистон 106 (18-35-53) зинаҳои дуюму сеюмро гирифтанд.
ТЕННИС
Медведеви рус дар финал ракеткаи 1-и ҷаҳонро шикаст дод
Теннисбози маъруфи Россия Даниил Медведев дар вохӯрии финалии мусобиқаи кушоди ИМА (US Open) бар ракеткаи якуми дунё Новак Ҷокович (Сербия) бо ҳисоби 3:0 (6/4, 6/4, 6/4) ғолиб омад.
Тибқи иттилои eurosport.ru, ин аввалин «Тоскулоҳи бузург» барои Медведев дар корномаи варзишиаш мебошад. Барои ин муваффақият Даниил $2,500,000 ва 2000 холи рейтингӣ гирифт.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 927