Аз 6 то 15 сентябр бахшида ба 20 - солагии таъсисёбии Созмони ҳамкории Шанхай дар Осорхонаи миллӣ намоиши “Марҳабо ба 20 - солагии СҲШ” ифтитоҳ гардид. Дар ин намоиши байналмилалӣ зиёда аз 200 расми маҳсули дасти кӯдакони 8 кишвари узви Созмони ҳамкории Шанхай - Россия, Хитой, Қазоқистон, Узбекистон, Тоҷикистон, Қирғизистон, Покистон ва Ҳиндустон ба тамошо гузошта шудааст.

Дар расмҳои кӯдакон дӯстию муҳаббат, сулҳу субот ва осмони софу беғубор дар ҳавзаи ин созмонро тасвир намудаанд, ки онҳо ҳар як бинандаро ба ҷаҳони рангин, тахайюлоти бой ва орзуҳои кӯдакони ин кишварҳо ворид менамояд. Дар ифтитоҳи намоиш зикр гардид, ки “халқҳои кишварҳои узви Созмони ҳамкории Шанхайро як қатор омилҳои объективӣ ба монанди анъанаҳо, шабоҳати забонҳо ва фарҳангҳо, наздикии этномаданӣ, ҳамбастагии муштараки таърихӣ, анъанаҳои халқҳои мо дар Роҳи Бузурги Абрешим, муносибатҳои неки ҳамсоягӣ муттаҳид намуда, онҳо ба рушди бомуваффақияти муносибатҳои мутақобилан судманди фарҳангӣ заминаи мустаҳкам мегузоранд”.

Хотирнишон шуд, ки ташкил ва баргузор намудани чунин намоишу чорабиниҳои фарҳангӣ миёни кӯдакон ва ҷавонони кишварҳои узви Созмони ҳамкории Шанхай ба мустаҳкам гардидани муносибатҳои фарҳангӣ замина гузошта, барои боз ҳам беҳтару хубтар огоҳ шудан аз таъриху фарҳанги халқу миллатҳои ҳамдигар шароити мусоид фароҳам меорад.

 

Л. РИЗОӢ, “Ҷумҳурият”