17 сентябр дар шаҳри Душанбе таҳти раёсати Президенти Ҷумҳурии Тоҷикистон муҳтарам Эмомалӣ Раҳмон нахустин мулоқоти сарварони кишварҳои узви Созмони ҳамкории Шанхай ва Созмони Аҳдномаи амнияти дастаҷамъӣ баргузор мешавад. 

Ба иттилои Вазорати корҳои хориҷӣ, дар ҷараёни мулоқот сарварони кишварҳои СҲШ ва СААД оид ба вазъи Афғонистон табодули афкор мекунанд.

 

 

Ҷаласаи Шурои ҳамоҳангсозони миллии кишварҳои узви СҲШ оғоз гардид

Дар Душанбе таҳти раёсати ҷониби Тоҷикистон ҷаласаи Шурои ҳамоҳангсозони миллии кишварҳои узви Созмони ҳамкории Шанхай оғоз шуд. Дар ин бора котиботи СҲШ хабар медиҳад.

Дар чорабинӣ масъалаҳои омодагӣ ба саммити СҲШ, ки 16-17 сентябр дар Душанбе доир мешавад ва лоиҳаҳои ҳуҷҷатҳое, ки барои имзо ба сарварони давлатҳо пешниҳод месозанд, баррасӣ мегарданд. Ҳамчунин, масъалаҳои фаъолияти ҷории созмон арзёбӣ мешаванд.

Вохӯрӣ то 15 сентябр идома меёбад.

 

 

ХУШХАБАР! 

Тоҷикистон дар мубориза бо COVID-19 пирӯз шуд

Давоми шабонарӯзи охир дар Тоҷикистон ягон ҳолати нави бемории шаҳрвандон ба коронавируси COVID-19 ба қайд гирифта нашуд.  Инчунин, давоми як шабонарӯзи охир 5 нафар аз бемории мазкур шифо ёфт, - хабар медиҳад Вазорати тандурустӣ ва ҳифзи иҷтимоии аҳолӣ.

Дар маҷмуъ, аз аввали бақайдгирӣ то 13 сентябр дар мамлакат 17084 нафар гирифтори коронавирус сабт ва аз ин шумора 16953 кас шифо ёфтааст. 124 нафар фавтид.

Сарфи назар аз ин, назорати эпидемиологии бемории COVID-19 дар гузаргоҳҳои Сарҳади давлатии Ҷумҳурии Тоҷикистон ва дар ҳудуди шаҳру ноҳияҳо ба таври мунтазам идома ёфта, рафтуомади шаҳрвандон ба хориҷи кишвар ва ба ҳудуди мамлакат таҳти назорати қатъӣ қарор дорад.

 

Лашкар ШАРИФЗОДА, “Ҷумҳурият”