"Истиқлол" аз идомаи рақобатҳо маҳрум шуд

14 сентябр тими «Истиқлол» дар бозии даври 1/8 финали Лигаи қаҳрамонҳои Осиё (Варзишгоҳи марказии ҷумҳуриявии шаҳри Душанбе) аз дастаи «Персеполис» (Эрон) бо ҳисоби 1:0 шикаст хӯрд. 

Ҳарчанд қувваҳо дар рафти нерусанҷӣ баробар буданд, дар дақиқаи 90+1 бозигари меҳмонон Маҳдӣ Торобӣ аз фурсат хуб истифода намуда, тӯбро вориди дарвозаи «Истиқлол» кард. 

Ҳамин тавр, «Персеполис» ба даври 1/4 финал роҳ ёфт ва «Истиқлол» аз идомаи рақобатҳо маҳрум шуд. 

 

ТАЭКВОНДО

Шаш медали Тоҷикистон аз мусобиқаи байналмилалӣ

Варзишгарони тоҷик дар мусобиқаи байналмилалӣ оид ба таэквондо WT «Shymkent Cup», ки чанде қабл дар шаҳри Шимкенти Қазоқистон баргузор гардид, шаш медал (тилло, нуқра, 4 биринҷӣ) ба даст оварданд.

Мусобиқот ба хотираи Рашид Жуманов бо ширкати 795 варзишгар аз ҷумҳуриҳои Қазоқистон, Қирғизистон, Тоҷикистон ва Узбекистон аз рӯйи чор синну сол – кӯдакон, наврасон, ҷавонон ва калонсолон гузашт.  

Ба иттилои Федератсияи таэквондо ВТФ-и Тоҷикистон, медали тиллоро Руҳангез Аҳмадова (миёни наврасон) сазовор гардид. Нишони нуқра насиби Абдураҳим Иброҳимов (кӯдакон) гашт. Медалҳои биринҷиро Муҳаммадҷон Суннатов (калонсолон), Нозия Туймуродзода (наврасон), Азимҷон Абдуллоев ва Идрис Ҳасанов (миёни кӯдакон) ба даст оварданд.

 

Маҳмуд БАҲРОМ, шореҳи варзиш