Дар ҷаласаи ғайринавбатии Шурои Маҷлиси намояндагони Маҷлиси Олӣ, ки таҳти раёсати Раиси Маҷлиси намояндагон Маҳмадтоир Зокирзода баргузор гардид, лоиҳаи Қонуни Ҷумҳурии Тоҷикистон «Дар бораи фаъолияти инжинирингӣ» мавриди баррасӣ қарор гирифт. 

Ба иттилои маркази матбуоти Маҷлиси намояндагон, дар ҷаласа таъкид шуд, ки лоиҳаи Қонуни Ҷумҳурии Тоҷикистон «Дар бораи фаъолияти инжинирингӣ»  бо мақсади танзими ҳуқуқии хизматрасониҳои муҳандисию машваратӣ, тадқиқотӣ, лоиҳавию конструкторӣ, ҳисоботию таҳлилӣ, хизматрасониҳо оид ба назорати техникии дорои хусусияти тиҷоратӣ дар таъмини равандҳои омодасозӣ ба истеҳсол ва фурӯши маҳсулот, инчунин, оид ба хизматрасонӣ ва истифодаи иншооти саноатӣ, инфрасохторӣ ва дигар иншоот таҳия ва пешниҳод шудааст.

 

 

Ба сафири ИМА дар Тоҷикистон  ёддошти эътирозӣ супурда шуд

Сафири фавқулода ва мухтори Иёлоти Муттаҳидаи Амрико дар Ҷумҳурии Тоҷикистон Ҷон Марк Поммершайм ба Вазорати корҳои хориҷии Тоҷикистон даъват гардид. Ба сафир оид ба суханони Президенти Амрико Ҷо Байден зимни боздид аз дидбонгоҳи оташнишонӣ дар Пенсилвания ёддошти эътирозӣ супурда шуд.

Ба иттилои Вазорати корҳои хориҷӣ, дар ёддошт омадааст, ки чунин суханҳо ба руҳияи муносибатҳои дӯстона ва шарикӣ ҷавобгӯ намебошанд.

Ҷониби Тоҷикистон ҳавасманди пешбурди робитаҳои судманд бо Амрико дар руҳияи ёрӣ ва эҳтироми ҳамдигар аст.

 

 

Мулоқот бо сафири Эрон

Муовини вазири корҳои хориҷии Ҷумҳурии Тоҷикистон Музаффар Ҳусейнзода сафири фавқулода ва мухтори Ҷумҳурии Исломии Эрон дар Ҷумҳурии Тоҷикистон Муҳаммадтақӣ Собириро ба ҳузур пазируфт.

Дар мулоқот масъалаҳои густариши муносибатҳои дуҷонибаи Тоҷикистон ва Эрон дар заминаҳои гуногун баррасӣ шуда, оид ба мушорикати ҷонибҳо дар ҳошияи созмонҳои байналмилалӣ ва минтақавӣ мубодилаи афкор сурат гирифт.

 

 

Вохӯрии сафири Тоҷикистон бо вазири корҳои хориҷии Туркия

Дар Вазорати корҳои хориҷии Ҷумҳурии Туркия вохӯрии сафири фавқулода ва мухтори Ҷумҳурии Тоҷикистон дар Туркия Ашрафҷон Гулов бо вазири корҳои хориҷии ин кишвар Мавлуд Чавушоғлу доир гардид.

Зимни мулоқот таҳким ва тақвияти ҳамкориҳо дар соҳаҳои мавриди таваҷҷуҳи муштарак баррасӣ гардиданд. Ҳамсуҳбатон дар атрофи масъалаҳои муҳими минтақавӣ ва байналмилалӣ табодули афкор намуданд.

 

 

«Фестивали тобистонаи Душанбе-2021» баргузор мегардад

25-26 сентябр дар «Наврӯзгоҳ» - и шаҳри Душанбе бахшида ба 30 - солагии Истиқлоли давлатии Ҷумҳурии Тоҷикистон бо ташаббуси Мақомоти иҷроияи ҳокимияти давлатии шаҳри Душанбе «Фестивали тобистонаи Душанбе-2021 (Dushanbe summer Fest - 2021)» бо иштироки ситораҳои Шарқ ва сарояндаҳои машҳури Тоҷикистон баргузор мегардад.

Фестивал бо мақсади ҷалби сайёҳон ва муаррифии Душанбе ҳамчун шаҳри дорои имконоти сайёҳӣ, дар доираи эълон гардидани шаҳри Душанбе «Пойтахти сайёҳии кишварҳои аъзои Созмони ҳамкории иқтисодӣ – 2020 -2021» ва «Пойтахти фарҳангии Иттиҳоди Давлатҳои Мустақил – 2021» созмон меёбад.

Бо ташкили шоу-консерт, хӯрокҳо ва хӯришҳои лазиз, шириниҳо ва обҳои ташнагишикан, бозиҳои шавқовари варзишиву зеҳнӣ, озмуну викторинаҳо, бозиҳои сиркӣ ва театрӣ, парвоз дар кураҳои ҳавоӣ ва дигар чорабиниҳои сайёҳиву фароғатӣ хотири меҳмонон болида гардонда мешавад.