16 сентябр дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Сарвазири Ҷумҳурии Арманистон Никол Пашинян, ки ҷиҳати иштирок дар ҷаласаи Шурои амнияти Созмони Аҳдномаи амнияти дастҷамъӣ дар Тоҷикистон қарор дорад, мулоқот карданд.

Дар мулоқот ҳолат ва дурнамои муносибатҳои ҳамкории ду кишвар баррасӣ шуд.

Президенти  мамлакат муҳтарам Эмомалӣ Раҳмон Сарвазири  Арманистонро хайрамақдам гуфта, робитаҳои деринаи Тоҷикистону Арманистонро омили муҳими рушди пайдарпайи муносибатҳои ду кишвар номиданд.

Ҷонибҳо зимни вохӯрӣ масоили таҳкиму тавсеаи ҳамкории дуҷонибаро дар соҳаҳои муҳими сиёсӣ, тиҷоратию иқтисодӣ, саноат ва фарҳанг муҳокима карданд.

Барои мусоидат ба рушду пешрафти робитаҳои дуҷониба татбиқи амалии санадҳои қаблан имзошудаи ҳамкорӣ, ҷоннок кардани фаъолияти Комиссияи байниҳукуматӣ оид ба ҳамкории иқтисодӣ ва дар ин замина баргузор намудани форумҳои тиҷоратӣ зарур шумурда шуд.

Зимни мулоқот ҳамчунин оид ба дигар масъалаҳои муҳими ҳамкории барои ҳар ду ҷониб судманд табодули афкор сурат гирифт.