Қурбонмурод Асоев дар деҳаи овозадори Тӯдаи Ҳисор, деҳе ки дар он ходими давлатӣ ва адиби шинохта Ҳабибулло Назаров тарбият ёфтааст, ба дунё омада бузург шудааст. Маълумоти миёнаро дар муассисаи таҳсилотии деҳааш гирифта, пас аз хатми Донишгоҳи миллии Тоҷикистон дар рӯзномаи «Байрақи ленинизм» кори эҷодиро оғоз намуд. Тақдири минбаъдааш ба ҳамин рӯзнома сахт тавъам омад. Пас аз чанде хизмат намудан дар мақомоти давлатӣ дар соли 1992, соле ки барои кишвари мо хеле вазнин буд, сармуҳаррири рӯзномаи «Ҳисори Шодмон» - ро ба зимма гирифт.

Дар чил соли фаъолияти рӯзноманигорӣ ҳама гӯшаю канори ин диёрро қадам ба қадаму ваҷаб ба ваҷаб гаштааст. Аксари мардумро мешиносад, бо мушкилоти рӯзгор ва шароити кории онҳо аз наздик ошност. Васфи садҳо қаҳрамонону диловарони арсаи ҷангу меҳнатро намуда, масъалаҳои ҳалталаби ҷомеаро ба доираи баҳсу баррасӣ кашидааст. Шиносоӣ бо мардум, ошноӣ бо тарзи зисту зиндагонӣ, урфу одатҳо ва омӯзиши хислату табиати шахсони зиёд ҷаҳонбинӣ ва донишу дарки масъалаҳоро дар вуҷуди ӯ вусъат бахшид. 

Ӯ шаш даъват депутати Шурои депутатҳои халқии ноҳияи Ҳисор интихоб шуда, айни замон вакили Маҷлиси маҳаллии вакилони халқи шаҳри Ҳисор мебошад.

Кор дар кумитаи иҷроияи шаҳр, мудирии шуъбаи ташкилӣ ва кор бо кадрҳо Қурбонмурод Асоевро бо ҳаёти ҷамъиятӣ боз ҳам наздиктар гардонд. Як зумра мутахассисони ҷавоне, ки бо пешниҳоди ӯ сари кор омаданд, дар ободии кишвар имрӯзҳо хизматҳои шоён карда истодаанд.

Вақте ӯ бори дигар ба рӯзномаи ноҳиявӣ чун сардабир ба кор омад, идора дар ҳоли табоҳ қарор дошт. Коғаз намерасиду маводи чоп. Дилсардии рӯзноманигорон меафзуд. Аммо Қурбонмурод Асоев навмед нашуд, дер-дер бошад ҳам, «Ҳисори Шодмон»-ро интишор медоданд. Аз ин ҷост, ки рӯзнома тадриҷан шуҳрати пештараашро дар байни мардум барқарор кард. 

Кори беҳтарини дунёро дар хомакашӣ дарёфт ва умри ширини худро ба ин касб бахшид. Гоҳо агар ба сифати вакили мардумӣ қаламро дар хидмати сиёсат гузошта бошад, гоҳо сиёсатро бо қаламу дафтар ошно кардааст.

Ин аст, ки Қурбонмурод Асоевро дар кишвар чун рӯзноманигори хуб ва дар водии Ҳисор чун ходими қавииродаи давлатӣ хуб мешиносанд.

Номбурда аз соли 1979 аъзои Иттифоқи журналистони Тоҷикистон буда, хизматҳояш дар ин ҷода бо унвони баланди Журналисти хизматнишондодаи Тоҷикистон қадр гардидааст. Ҳамчунин, нишонҳои аълочии маориф, фарҳанг ва матбуоти Тоҷикистонро дорад. 

 

М. ТАБАРӢ, «Ҷумҳурият»