Дар Чемпионати Осиё Суруди миллии Тоҷикистон садо дод

Дар Чемпионати Осиё оид ба ҷиу-ҷитсу (Asian Jiu Jitsu Championship 2021), ки дар шаҳри Абу-Дабии Амороти Муттаҳидаи Араб идома дорад, варзишгарони Тоҷикистон ду медал (тилло ва биринҷӣ) ба даст оварданд. 

Ба иттилои Алиҷон Давлатов, сармураббии тими мунтахаби кишвар оид ба  ҷиу-ҷитсу, ки ҳоло дар Абу-Даби қарор дорад, медали тиллоро Маъруфҷон Назарзода дар вазни 94 кг соҳиб гардид. 

Нишони биринҷӣ насиби Малика Бобоева дар вазни 45 кг гашт. 

Паҳлавони дигари тоҷик Ҷумахон Ҷумахонов (62 кг) имрӯз барои нерусанҷӣ ба майдон мебарояд.

 

КМО ҶХД Корея 

барои ширкат накардан дар Бозиҳои олимпӣ муҷозот шуд

Шурои иҷроияи Кумитаи байналмилалии олимпӣ (КБО) оид ба мутаваққиф кардани фаъолияти Кумитаи миллии олимпии Ҷумҳурии Халқии Демократии Корея (ҶХДК) то охири соли 2022, бо сабаби иштирок накарданаш дар Бозиҳои олимпии Токио-2020, қарор қабул кард. Тибқи он, нисбат ба Кумитаи миллии олимпии ҶХДК як қатор таҳримот, аз ҷумла КМО ҶХДК дар давраи боздоштани фаъолият аз ягон ёрӣ ё барномаи КБО баҳра намебарад, ҷорӣ гардид.

Гуфта мешавад, ки КМО ҶХДК, талаботи қоидаи 27.3 Хартияи олимпиро риоя накардааст. Зеро дар он омадааст: «КМО ваколати истисноии намояндагӣ намудани кишвари худро дар Бозиҳои олимпӣ, чорабиниҳои маҷмуии варзишии минтақавӣ ва қитъавӣ, ки зери сарпарастии КБО гузаронда мешаванд, дорад. КМО ҷиҳати иштирок дар Бозиҳои олимпӣ тавассути сафарбарии варзишгарон уҳдадор аст».

 

Маҳмуд БАҲРОМ, 

шореҳи варзиш